Kandidati për Bashkinë Tiranë i dalë nga primaret në Partinë Demokratike, Belind Këlliçi u shpreh se do të shqyrtohet një moratorium për ndërtimet për një periudhë 6 mujore ose për 1 vit.
Teksa ishte i ftuar në ‘Ora News’, ai se Tirana është i vetmi kryeqytet në botë që ka një pallat pa leje mbi një kullë.
‘Kemi në shqyrtim një moratorium për ndërtimet për një periudhë 6 mujore ose për 1 vit, për të ndaluar betonizimin pra kriter të Tiranës dhe të shohim lejet. Tirana është i vetmi kryeqytet në botë që ka një pallat pa leje mbi një kullë. Kjo ndodh me Sytë e Tiranës që është përballë zyrës së kryebashkiakut dhe ku janë 7 kate pa leje. Ka me mijëra qytetarë që nuk ndërrojnë dot pllakat e banjos sepse të vijnë policët bashkiakë. Bëhet publike dhe thotë kryetari i bashkisë se nuk e kishte parë. Qyteti duhet të zhvillohet edhe në polet e tjera që kryebashkiaku nuk i ka zhvilluar këto pole. Ndërkohë për këtë pallatin pa leje, kryebashkiaku i dha një leje tjetër ndërtuesit, duke shembur të vetmen qendër rinore për të ndërtuar një përbindësh betoni’, u shpreh Këlliçi.
Po ashtu, ai tha se do ta heq këtë taksë pas 14 majit sepse janë mbledhur 42 milionë euro nga bashkia dhe nuk dihet se ku kanë shkuar.
“Kam qenë deputet deri ditën e premte në unazën e Re dhe Astir ku janë 70 mijë banorë, gati sa Lushnja ose Berati dhe nuk kanë çerdhe dhe shkollë. Të dalë dikush dhe të ma mohojë këtë deklaratë. E njëjta gjë për zonën e liqenit të Thatë dhe Kodrës së Diellit që nuk ka asnjë çerdhe dhe asnjë shkollë në një kryeqytet që paguan një taksë antikushtetuese për arsimin. Unë do ta heq këtë taksë pas 14 majit sepse janë mbledhur 42 milionë euro nga bashkia dhe nuk dihet se ku kanë shkuar. Shkolla ndërtohen me 6 herë të çmimit të atyre që ndërton BE. Paratë janë aty dhe ka mjaft hapësira për të investuar.”
