Kandidati i opozitës për zgjedhjet lokale në Kuçovë, Lefter Maliqi u shpreh i bindur për fitoren e lokaleve të 14 Majit.
Gjatë një aktiviteti në kinemanë e qytetit, ku i pranishëm ishte dhe kryetari i PD-së Sali Berisha, Maliqi tha se veç mbështetësve të opozitës, votën për koalicionin “Bashkë Fitojnë” do e japin dhe socialistët e ndershëm.
“Unë kam një bindje se përveç opozitës do na bashkohen edhe të majtët e ndershëm që janë të zhgënjyer nga qeverisja lokale”, tha Maliqi. Ai akuzoi se zyra e kryetarit të Bashkisë sot “është e ndotur me imoralitet e korrupsion”.
“Zyra do s’do ketë më polic si tani, por do jetë e hapur për qytetarët“, theksoi.
Lefter Maliqi premtoi investime në qytet dhe fshatra. Sipas tij, ish-komunat janë lënë në harresë nga qeverisja lokale socialiste.
Maliqi tha se do të investohet në rrugën e Velagoshtit dhe urën e Bardhajt. “Qyteti dhe fshatrat do kthehen në kantier ndërtimi”, tha Maliqi, duke shtuar se do eliminohen tenderat korruptivë, që sipas tij zhvillon PS. “Rrugët, urat në fshatra, do bëhen të gjitha”, u shpreh kandidati i opozitës.
Ai premtoi ndërhyrje në fasadat e pallateve, në rrugë, ura, një muze për të treguar historinë e qytetit, ndihma për pensionistët, përmirësim të infrastrukturës së tregut të qytetit, etj.
“Unë i mbaj premtimet”, theksoi Maliqi.
Po ashtu, ai paralajmëroi se nga kampi kundërshtar do të ketë tentativa për blerje votash e manipulime.
“13 dhe 14 Maji do bëjnë të pamundur për të ndarë lekë, për presione dhe manipulim”, tha Maliqi, i cili shtoi se “ne do jemi të palëkundur”.
Vlerësim, Maliqi mori nga kreu i PD-së Sali Berisha. Ky i fundit tha për kandidatin e koalicionit opozitar se është “një nga qeveritarët vendor më të përkushtuar të këtij vendi”.
“Një bir të këtyre trevave, që pushtetin që i dhanë ju, e përdori për transformime, ndryshime, përmirësim të jetës tuaj, të kushteve tuaja, të punës tuaj në tërësi. Komunat në të cilat qeverisi Lefter Maliqi, pësuan ndryshime më thelbësore se shumë e shumë rajone e komuna të tjera të vendit, dëshmi kjo e përkushtimit, por edhe e ndershmërisë, transparencës, vizionit, dashurisë së tij për të ndryshuar çdo ditë realitetin ku jetoni. Lefter Maliqi në çdo detyre, ka qenë dhe ka dëshmuar një përkushtim të madh. Ai vjen sot si kandidat i koalicionit me mbështetje të plotë dhe totale të demokratëve, të qytetarëve, të Partisë së Lirisë dhe unë kam bindjen e madhe se këtu në Kuçovë, koalicioni ynë do të ketë një nga sukseset më të shkëlqyera”, shtoi Berisha.
