Udhëtimi drejt Italisë si punonjës sezonal për një 25-vjeçar shqiptar do të përfundojë me një kohë goxha të gjatë pas hekurave, pasi eksperiencën e ka shfrytëzuar për të hyrë në tregun e tregtisë së drogës.
I riu shqiptar është arrestuar në Cervia të Italisë, pasi policia në makinën e tij gjeti pas një kontrolli 3.3 kg kokainë në makinë.
25-vjeçari kishte fshehur kokainën në pjesën e poshtme të sediljes së makinës dhe qëllimi ishte ta shpërndante ne në Cervia.
Shqiptari që gjatë verës punonte në lokalet e zonës së plazhit kishte rënë në sy të efektivëve pasi kishin marrë denoncime nga qytetarët e zonës, për shkak të lëvizjeve të shpeshta të të riut.
Droga e gjetur ishte ndarë në tre pjesë, nga 1 kilogram secila.
Hetuesit bastisën edhe shtëpinë e shqiptarit me iniciale D.R., në Pisignano di Cervia, me ndihmën e njësive të qenve kundër drogës.
Ata gjetën një shumë prej rreth 1100 eurosh, të ardhura që burim kanë veprimtaritë e paligjshme.
I riu shqiptar ndodhet në paraburgimin e Ravenës, në pritje të marrjes së dënimit.
