Një sherr i paprecedentë midis efektivëve të policisë është regjistruar mbrëmjen e djeshme rreth orrës 23:55 në rrugën “Bardhyl”, në kryeqytet.
Mësohet se Hamit Sallaku së bashku me dy djemtë e tij Denis Sallaku dhe Mariglen Sallaku, të tre punonjës policie në Tiranë, janë konfliktuar me forcat “Shqiponja”, të cilat po patrullonin në këtë lagje.
Njëri prej djemve të Hamit Sallakut ka qenë në nën efektin e alkoolit dhe ka ofenduar punonjësit e “Shqiponjave”, çka ka bërë që të nisi përplasja fizike mes tyre.
Aktet e dhunës janë regjistruar gjatë shoqërimit nga “Shqiponjat” të Sallakut dhe djemeve të tij, ndërsa AMP dhe Drejtoria e Standarteve Profesionale kanë nisur hetimin disiplinor për rastin në fjalë.
Sakaq, mesditën e sotme, Drejtori i Policisë së Tiranës, Tonin Vocaj ka vendosur të pezullojë nga detyra inspektor Hamit Sallakun (me detyrë ndihmës specialist për Policimin në Komunitet në Komisariatin Nr. 1) dhe dy djemtë e tij, inspektorin Mariglen Sallaku (me detyrë ndihmës specialist për Hetimin e Krimeve në Komisariatin Nr. 2) dhe Denis Sallaku, (me detyrë ndihmës specialist për Policimin në Komunitet në Komisariatin Nr. 3).
