Heqja përfundimtare e patentës nuk e ka penguar aspak një të ri nga Tiranë që të sfidojë forcat e rendit.
I riu me inicialet A.H. ka dalë në qarkullim në timonin e një makine, ku më pas u gjet një maskë dhe një shkop metalik si ai që përdorin efektivët e policisë.
Blutë e kryeqytetit bëjnë me dije se në rrugën “Njazi Meka” vunë në pranga 26-vjeçarin në fjalë gjatë mbrëmjes së djeshme.
Njoftimi i policisë:
Shërbimet e Forcës së Posaçme “Shqiponja” (Seksioni i Shigjetave), në bashkëpunim me shërbimet e Komisariatit të Policisë Rrugore Tiranë, në vijim të kontrolleve me përzgjedhje, bazuar dhe në informacionet e marra në rrugë operative për një shtetas që qarkullonte me automjet pa leje drejtimi dhe që mbante sende të kundraligjshme në automjet, kanë intensifikuar kontrollet për kapjen e tij dhe në rrugën “Njazi Meka”, kanë konstatuar dhe ndaluar automjetin e dyshuar.
Gjatë kontrollit rezultoi se drejtuesi i automjetit shtetasi A. H., 26 vjeç, banues në Babrru, drejtonte automjetin pa leje drejtimi, pasi ajo i ishte hequr përfundimisht dhe drejtuesi i automjetit duhet të rifutej në kurs, për t’u ripajisur me leje drejtimi.
Gjatë kontrollit në automjet, shërbimet e Policisë gjetën dhe sekuestruan në cilësinë e provës materiale një maskë të zezë dhe një shkop metalik si ato të Policisë.
Në përfundim të veprimeve të para hetimore, u bë arrestimi në flagrancë i shtetasit A. H., dhe materialet i kaluan Prokurorisë për veprime të mëtejshme procedurale, për veprat penale “Drejtimi i automjeteve në gjendje të dehur apo pa dëshmi” dhe “Prodhimi dhe mbajtja pa leje e armëve te ftohta”.
