Kryetari i Bashkisë Bulqizë, Lefter Alla është shkarkuar nga detyra me vendim të Këshillit të Ministrave. Shkarkimi nga detyra vjen si pasojë e shkeljeve të rënda dhe abuzimet me tendera.
Pak ditë më parë, kryebashkiaku i ka mohuar akuzat ndaj tij, të cilat i konsideron politike. Ndërkohë, vendimi i sotëm i Këshillit të Ministrave mbetet i diskutueshëm sepse, pavarësisht se Alla sot është i arrestuar si i dyshuar për korrupsion, gjykata nuk ka dhënë asnjë vendim për çështjen në fjalë.
Kjo ngre dyshime mbi atributin e kryeministrit për të vlerësuar se cilat mund të quhen shkelje të rënda të Kushtetutës ose ligjeve, ndërkohë që Gjykata nuk është shprehur ende.
Sipas nenit 62 i ligjit për “qeverisjen vendore:
Shkarkimi i kryetarit të bashkisë
Kryetari i bashkisë shkarkohet me vendim të Këshillit të Ministrave në rastet kur:
a) kryen shkelje të rënda të Kushtetutës ose të ligjeve;
b) dënohet për kryerjen e një vepre penale, me vendim të formës së prerë, nga gjykata;
c) propozohet për shkarkim nga këshilli bashkiak përkatës për mosparaqitje në detyrë për një
periudhë 3-mujore të pandërprerë.
Vendimi i Këshillit të Ministrave:
SHKARKIMIN NGA DETYRA TË KRYETARIT TË BASHKISË BULQIZË, Z. LEFTER ALLA
Në mbështetje të neneve 100 e 115, pika 1, të Kushtetutës, dhe të shkronjës “a”, të nenit 62, të ligjit nr.139/2015, “Për vetëqeverisjen vendore”, të ndryshuar, me propozimin e ministrit të Brendshëm, Këshilli i Ministrave
VENDOSI:
Shkarkimin nga detyra, për shkak të shkeljeve të rënda, të kryetarit të Bashkisë Bulqizë, z. Lefter Alla.
Ky vendim hyn në fuqi menjëherë dhe botohet në “Fletoren zyrtare”.
Kryeministri
Edi Rama
Në mungesë dhe me porosi
Zëvendëskryeministri
Belinda Balluku
- Detajet nga arrestimi
Trembëdhjetë persona, përfshirë Lefter Allën dhe zyrtarë të tjerë të Bashkisë Bulqzië janë arrestuar, sipas SPAK. Ndaj 11 prej tyre, sipas akuzës, GJKKO caktoi me kërkesë së SPAK masat e arrestit me burg më 14 Mars, që u ekzekutuan nga policia dy ditë më vonë (megjithatë çuditërisht, ndaj njërit prej tyre masa nuk u ekzekutua pavarësisht pretendimit të SPAK). Ndërsa ndaj dy të tjerëve u ekzekutua masa e arrestit shtëpiak.
Prokuroria bën me dije se nga hetimi, ka rezultuar se për shtetasin nën hetim Lefter Alla me detyrë Kryetar Bashkie me funksionin e tij si i zgjedhur vendor për të administruar konform ligjit Njësinë vendore Bashkinë Bulqizë, evidentohet qartësisht sjellja e tij duke dokumentuar disa fakte penale si shkeljet gjatë procedurës së prokurimin publik me procedurë të hapur në datë 30.04.2021, operatorëve ekonomikë “Egland Sh.p.k” dhe “BE-IS” Sh.p.k, me objekt “Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ, Lagja e vjetër, qyteti Bulqizë, Bashkia Bulqizë”, me vlerë të tenderit në shumën 322.439.000 lekë të reja, me afat kohor 10 mujor.
Alla në bashkëpunim me nënkryetaren e Bashkisë, dhe punonjësit e tjerë, si specialiste e prokurorimeve, anëtarët e KVO, kanë bërë të mundur që këtë tender ta fitonte me dokumentacion “BOE Egland shpk” dhe “BE-IS shpk”, duke krijuar avantazhe për këtë subjekt gjatë procedurës së prokurimit, shton SPAK në një njoftim zyrtar. Nga hetimi ka dyshime të arsyeshme të bazuara, se punimet janë kryer nga “OE 2AF Albania shpk”, lidhje shoqërore e kryetarit të Bashkisë.
“Kjo procedure prokurimi dyshohet që është inicuar dhe zhvilluar në kundërshtim me LPP dhe aktet nënligjore dhe nga AK Bashkia Bulqizë, konkretisht nga të hetuarit me veprime aktive që konsistojnë në ngritjen e një mekanizmi të posaçëm, për nxjerrjen fituese të një firme në lidhje me proceduren e prokurimit të zhvilluar nga Bashkia Bulqizë. Aktet deri në këtë fazë të hetimit njoftojnë se të hetuarit miratuan kritere për të favorizur një firmë pjesëmarrës në tender, firma pjesëmarrëse në prokurim paraqiste vetëm dokumetacionin, ndërkohë punimet realizoheshin nga i hetuari Aqif Konesha, i cili rezultoi lidhje e afërt e Kryetar i Bashkisë”, thuhet më tej në njoftim.
