Dhjetë nga 20 të arrestuarit e ditës së djeshme në Tiranë, në kuadër të operacionit “Harta” që goditi dy grupe kriminale që kishin krijuar një rrjet të mirëfilltë të shpërndarjes së drogës në pika të caktuara (pranë shkollave dhe klubeve të natës) në kryeqytet, janë lënë në burg nga gjykata.
Togat e zeza kanë vendosur masën e sigurisë “arrest në burg” për 10 nga të arrestuarit, ndërsa pjesa tjetër do të dalë në gjyq ditën e nesërme.
Në total gjatë operacionit “Harta” u arrestuan 20 persona dhe 4 të tjerë u shpallën në kërkim. Po ashtu policia sekuestroi 2 kilogramë e 120 gramë kokainë, 300 doza kanabis, 130 doza heroinë, shuma parash rreth 5 milionë lekë të vjetra, 1700 euro, 11 automjete dhe 29 aparate celulare.
Ndërkohë nga përgjimet rezulton se anëtarët e të dy grupeve kishin edhe kodet e tyre të komunikimit për të mos rënë në sy, jo vetëm në komunikimet verbale por edhe në celular.
Disa nga kodet që ata përdornin ishin “Vëllai i madh”, “Vëllai i vogël” dhe “Pluhur zane” referuar kokainës apo “seqe” referuar kanabisit që korrespondojnë me lëndën narkotike që ata shpërndanin.
Mësohet se kodi “Vëllai i madh” dhe “Vëllai i vogël” (nëse ishte sasi më e vogël, si 0.5 gram apo 1 gram) i referoheshin sasisë së kokainës që do të shpërndahej.
Policia dhe prokuroria ka administruar dhjetëra telefonata për të siguruar fillimisht deshifrimin e kodeve dhe më pas sigurimin e provave për veprimtarinë kriminale. Prej tyre është zbuluar se pjesa më e madhe e kanabisit shitej te ‘Petro Nini’. Një nga të arrestuarit, Dorjano Çela ishte personi që kishte siguruar klientët në këtë gjimnaz.
Sipas burimeve, një nga vajzat e shpallura në kërkim, rezulton sipas sistemit TIMS dhe është larguar në Itali më datë 14 mars, një javë para operacionit. Shtrirja e aktivitetit të tyre ishte e ndarë në 11 zona të ndryshme duke përfshirë këtu 28 lagje.
Anëtarët e grupeve ndaheshin në nën grupe të vogla me 2, 3 apo 4 anëtarë. Numri më i lartë, me 4 anëtare ishte në zonën e Bllokut, Kombinatit dhe në Yzberisht.
Personat për të cilët u caktua masa e sigurisë “Arrest me burg”:
Jurgen Hasmataj
Altin Lani
Armaldo Xheladini
Dorjano Çela
Fabian Qoku
Muharem Tarushi
Denis Idrizi
Erion Xhaxho
Polikron Shabani
Redi Lolaj
