Mesditën e sotme në portalin “PublikTV.Live” u publikua një audio-përgjim i gazetarit të “Report TV”, Adriatik Doçi, i cili zbërthen në detaje skemën që ai përdor për t’u vendosur gjoba biznesmenëve të ndryshëm, por edhe politikanëve të lidhur me qeverinë Rama.
I njohur si “gazetari i Rilindjes”, për shkak se i ka shprehur publikisht bindjet e tij politike si mbështetës i partisë në pushtet, Adriatik Doçi bën publikime për llogari të një portali të quajtur “Prapaskena”, duke përdorur një gjuhë të ashpër, fyese dhe kërcënuese.
Me çfarë ai vetë tregon në audio-përgjim, provon se publikimet kanë një qëllim dhe ai është lidhja e kontratave për përfitime personale abuzive me kompanitë, të cilat shantazhon në emër të gazetarisë.
Pas reagimeve të shumta në rrjet për audio-përgjimin me protagonist gazetarin, Adriatik Doçi është përgjigjur me anë të një postimi në Facebook ku shprehet se ai nuk shantazhohet lehtë.
Doçi hedh akuza në drejtim të gazetares që sipas tij ka realizuar audi-çimkën dhe po keqpërdoret nga një person i tretë, të cilin e identifikon si Naim Noka.
Postimi i Doçit:
Miq, e ndiej detyrim moral dhe në respekt të fytyrës që kam, të bëj një sqarim për një audio-çimkë të publikuar sot.
Një kolege gazetare, duke pirë kafe, më pyet se si funksionon tregu i reklamave në media. Dhe unë i shpjegoj që kur me një biznes ke marrëveshje reklamimi, nuk mund të publikosh lajme kundër tij.
Ky është një realitet i rëndomtë. Një bisedë që mund ta bëj 1 mijë herë.
Barra morale bie mbi kolegen që përgjon biseda në tavolinë me telefon. Megjithatë e mirëkuptoj kolegen dhe më vjen keq që po e përdorin.
Kush më njeh e di që nuk shantazhohem. Të gjithë dashamirësit e mi të rrinë të qetë.
Unë nuk kam as media dhe as nuk kam lidhur kontratë me askënd, por pa dyshim që kam akses në media.
Publikuesi është një pseudodazetar i quajtur Naim Noka, të cilin dyshoj se kanë paguar. Nuk ka lidhje me gazetarinë.
U kujtova se ky tipi më ka ndërhyrë disa herë për të hequr shkrime. Madje, një herë, më ka marrë në mesnatë si sekser.
Nëse do të bëjë gazetari, të tregojë nëse pagoi gjë për porosinë që unë i kreva në atë rast? Ky është morali dhe burrëria.
Unë po godas korrupsionin dhe po nxis drejtësinë e re për të çuar drejt burgut ish ministra dhe ish kryeministra. Për mua, sulme të tilla janë të parashikueshme.
