Vrasja e Pëllumb Islamit në një shisha-bar në “Nea Ionia” të Athinës më 21 shkurt, është zbardhur plotësisht nga autoritetet greke dhe përveç 34-vjeçarit Elis Salaj nga Fieri (kreu i Grupit L) që është shpallur në kërkim për ngjarjen, një tjetër bashkëkombës ka rënë në pranga.
Për vrasjen e të riut nga Delvina, i cili mbeti viktimë e një përplasje me armë midis vëllait të tij dhe Salajt, pas një atentati të dështuar ndaj këtij të fundit, në pranga ka rënë një 23-vjeçar shqiptar.
I arrestuar ditën e djeshme nga autoritetet greke, i riu rezulton një person me precedentë të theksuar kriminalë, që nisin me “gjobëvënie” dhe mbyllen me “vrasje të kryer nga pakujdesia”.
Mes akuzave të ngritura më herët ndaj tij janë dhe “shkatërrim prone”, “kanosje me armë zjarri”, “pranim dhe mbajtje të produkteve të veprës penale”, “vjedhje në bashkëpunim” e “vjedhje e mbetur në tentativë”.
Mësohet se shqiptari i arrestuar njihej në Athinë me emrat “Dhimitri” dhe “Nektarios”. Ai është një nga 6 personat e shpallur në kërkim për vrasjen e 40-vjeçarit Islami.
Ndërkohë, mediat greke duke iu referuar burimeve policore raportojnë se 2 prej 6 të kërkuarve rezultojnë të jenë arratisur në Shqipëri, ndërsa një tjetër person i përfshirë në ngjarje rezulton ende i paidentifikuar.
Ndërkohë në episodin fatal, nga sa ka rezultuar nga hetimet, janë përdorur dy armë, një revole dhe një pistoletë.
Dyshimet janë se Islami përveçse nuk është qëlluar aksidentalisht, siç u raportua fillimisht, ka qenë edhe shënjestra e atentatit së bashku me të vëllanë, pasi ishte anëtar i bandës me të cilin ‘grupi L’ kishte mosmarrëveshje.
“Grupi L” përbëhet nga të paktën tetë anëtarë, me origjinë shqiptare, me të kaluar kriminale “të rëndë” që kontrollojnë një klub të njohur në Sepolia, ndërsa disa prej tyre shfaqen si truproja për të vënë gjoba në disa biznese në Athinë.
