Në bashkinë minoritare të Dropullit, gara për zgjedhjet lokale të 14 majit pritet të diskutohet midis kryebashkiakut aktual, Dhimitraq Toli dhe një rivali nga PBDNJ, sipas marrëveshjes së koalicionit që është firmosur mes aleatëve Vangjel Dule dhe Sali Berisha.
Konfirmimin për kandidaturën e Tolit në të dytat zgjedhje lokale radhazi, duket se e ka bërë drejtuesja e qarkut të Gjirokastrës për PS, njëherësh ministre e Turizmit, Mirela Kumbaro.
Në mbledhjen e Asamblesë Socialiste të Dropullit që u zhvillua këtë të dielë, Kumbaro pasi ka shpërndarë porositë e lëna nga Rama në mbledhjen e Kryesisë për bazën, ka transmetuar edhe mesazhin për rikonfirmimin e Tolit.
“Me Asamblenë Socialiste të Dropullit, ku rikonfirmojmë pa asnje dileme Dhimitraq Toli si kandidatin tonë për garën në #14MAJ , të sigurt se do të vijojë po me aq përkushtim punët në krye të bashkisë. Kemi platformën më të mirë për qytetarët, me të cilët jemi në komunikim çdo ditë në secilën njësi administrative, në çdo lagje, për të takuar e dëgjuar gjithkënd sepse Partia Socialiste është e vetmja forcë politike për njerëzit”, shkruan Kumbaro në rrjetet sociale.
Ndërkohë, sa i përket figurës së Tolit, ai njihet si kryebashkiaku që ndezi rrjetet sociale në Janar të këtij viti, pas pjesëmarrjes në një festë të nacionalistëve grekë në Athinë, ku pozonte me flamurin e “Vorio Epirit” pas krahëve.
Toli nuk e ka aspak problem jo vetëm të marrë pjesë në festat e shoqatave të të ashtuquajturit “Vorio Epir”, por publikon edhe foto me flamurin e gjoja autonomisë së pretenduar të këtij rajoni në vitin 1914.
Toli në Athinë i është bashkuar një organizimi që është ndërmarrë nga organizata ekstremiste greke, të cilat qëndrojnë shpesh pas trazirave të ndryshme që janë krijuar në zonën e minoritetit grek në vendin tonë dhe vazhdimisht ushqejnë gjuhën e urrejtjes dhe pretendimeve territoriale.
Kryetari i Dropullit është zgjedhur pa garë në vitin 2019 si përfaqësues i Partisë Socialistem ndërsa Edi Rama e ka përdorur atë shpesh si shembull për t’i treguar Athinës zyrtare integrimin dhe përfaqësimin e mirë të minoritetit grek në Shqipëri.
Sakaq, vetë Toli keqpërdor funksionin zyrtar për orekset e tij nacionaliste që i përkasin fantazmave të së shkuarës, dhe jo vetëm, pasi ka një oreks “të paparë” për tendera me vlerë mijëra euro.
Në dhjetor, rreth 6 muaj para zgjedhjeve lokale të majit, Boldnews.al zbuloi se Toli, me një të rënë të lapsit, ka firmosur fituesin e tenderit 540 mijë euro për rikonstruksionin e një shkolle.
Shkolla që kanë zgjedhur të rikonstruktojnë është në fshatin Bularat, atje ku çdo vit bëhen demonstrate për vrasjen e Kostandinos Kaçifës.
Megjithëse fshatrat e Dropullit zbrazen dita-ditës, bashkia më shumë mendon për të bërë miliona me tendera abuzivë, sesa të rikonstruktojë një shkollë. Veçanërisht për Tolin, paraja s’ka ngjyrë, aq më tepër patriotizëm apo edhe politikë, ndaj ai i dhuron firmës “GJIKURIA” SHPK me vlerë 53.945.123 lekë pa TVSH, edhe pse oferta e tyre ishte rreth 4 milionë lekë të rinj (40 mijë euro) më shumë sesa oferta më e ulët.
LEXO EDHE:
Kryebashkiaku i Ramës në Dropull, feston me flamurin e “Vorio Epirit” (FOTO)
Dhimitraqi i Dropullit, 540 mijë € “Gjikurisë” megjithëse kishte ofertën më të lartë
