“Taulant Balla thikë pas shpine PS” dhe “Fieri nuk është Elbasan”, janë dy parrulla të shkruara me bojë të zezë mbi murin e bardhë të selisë së Partisë Socialiste në Fier.
Kreu i Grupit të PS prej shtatorit të 2021, kur Edi Rama realizoi një rrokadë që do të mbahet mend për ndarjen e influencës brenda partisë, u emërua drejtues politik në qarkun Fier.
Kryeministri nuk mori aspak parasysh faktin se Balla doli në krye të listës si kandidati më i votuar në Elbasan, me 21591 vota. Rama rrëzoi pritshmëritë e Ballës për të “rrëmbyer” postin e Ministrit të Brendshëm, e madje e “zhveshi” edhe nga detyra e Sekretarit të Përgjithshëm të PS, duke ia besuar postin Damian Gjiknurit.
Sakaq, në Fier zëvendësimi i Gramoz Ruçit të tërhequr nga politika me Ballën duket se asnjëherë nuk ka ngjallur reagime pozitive te socialistët.
Duket se këtë e tregojnë më së miri edhe parrullat në mur, përkrah të cilave shënohet se janë shkruar nga socialistë të ndershëm.
Shprehja kaq hapur e pakënaqësisë në prag të zgjedhjeve lokale 2023, tregon se kampi socialist në Fier si rrallë herë mund të jetë përçarë.
Ndaj Ballës ka patur shpesh akuza për lidhje me bandat e Elbasanit dhe përçarje të socialistëve, ku më zgjedhjet e fundit parlamentare Balla punoi për emrin e tij që të dalë si më i votuari nga deputetët socialistë.
