“Mallkuar qofshin ato plumbat që i zbrazën në trupin tënd! Qofsh e xhenetit mam”.
Këto ishin rreshtat që Sajmir Paja, i biri i 58-vjeçares, e cila mbeti viktimë e atentatit që u shndërrua në masakër në lokalin e Fajton Muratit, i dedikoi të ëmës, disa orë pasi Mimoza Paja ndërroi jetë në vendin e punës nga plumbat e marrë prej breshërisë së kallashnikovit.
E teksa kanë kaluar disa ditë nga ngjarja e rëndë dhe autorët ende nuk janë zbardhuar, Sajmir Paja ka shprehur indinjatën për mënyrën sesi u përfol në media lidhja e nënës së tij të ndjerë me mbesën 10-vjeçare.
Ai ka treguar në një intervistë televizive se nëna dhe mbesa e tij 10-vjeçare që mbeti e plagosur nga copëzat e xhamit, kanë qenë shumë të lidhura me njëra-tjetrën, por kjo nuk do të thotë se motra e tij nuk kujdesej për vogëlushen siç u raportua në televizionet informative.
Teksa thyen heshtjen për emisionin ‘Pa Gjurmë’, ai gjithashtu sqaron se nëna e tij kur ndodhi ngjarja nuk ishte duke kryer detyrën si kamariere, por kishte shkuar në lokal si një kliente e thjeshtë për të konsumuar një kafe.
“Di që në atë lloj ore nuk ka qenë aty, thjesht ka qenë duke dalë për të marrë një kafe për vete se e konsumon shumë, e pëlqente. Nuk donte të rrinte vetëm në shtëpi, shkonte vinte, dilte”, ka rrëfyer Sajmiri.
Mes të tjerash i biri i 58-vjeçares pohon se lajmin e kobshëm e ka marrë vesh nga mediat. “Unë në ato momente sapo kisha ardhur, 10 minuta kisha sjellë njerëzit këtu. Shkova se kisha punën time, thjesht isha ulur në lokal duke pirë kafe. Më bie telefoni nga kunati, nga dhëndri im banon këtu afër meje, tha: Hajde se ndodhi kjo që ka ndodhur. Gjatë rrugës po shihja portalet, e vetmja gjë që më shkoi në mendje i lutesha zotit, ishte mbesa, pjesa më e madhe sa e mora vesh që kishte mbaruar… (qan)”, rrëfehet ai.
Ndërkohë, vajza e Mimoza Pajës, nëna e 10-vjeçares e cila ishte në vendin e ngjarjes pohoi se nuk e kishte braktisur të bijën, por se kjo e fundit jetonte me gjyshen pasi ishte shumë e lidhur.
“Po shumë mirë, mirë është për momentin. Vajza ka qëndruar me gjyshen për arsye se e ka dashur shumë gjyshen dhe nuk është se e kam lënë unë. Përkundrazi unë kam pas edhe probleme me burrin për arsye se donte të rrinte tek gjyshja. Por gjyshja e ka dashur aq fort dhe janë dashur aq shumë me njëra-tjetrën sa ka qenë e pamundur që ta largoje nga nëna ime”, tha vajza e viktimës.
Ndërkohë, Sajmiri është shprehur i indinjuar nga lajmet që qarkulluan për nënën e tij.
“Me ato që kam dëgjuar ma kanë neveritur, më kanë vrarë për së dyti herë më tepër. Mesazhi është; të bëhen më njerëzor. Të shohin njerëzillikun, të rezervohen në dhënien e lajmeve, nuk është jeta një klikim. Konkurrencën mbajeni me gjëra reale, jo për klikime. S’kam të drejtën e askujt t’i bëj gjykimin një personi sado mund të jetë i lartë ose më i varfër, nuk kemi pse ta paragjykojmë, edhe nëse ka qenë ashtu, duhet t’i japim mbështetje jo t’ja thyejmë zemrën më shumë”, shtoi ai.
