Nëse kandidatura e Igli Carës për bashkinë e Durrësit ishte e pakontestuar në radhët e demokratëve dhe erdhi si një figurë gjithpërfshirëse dhe alternativë për banorët e qytetit bregdetar, duket se emrat që janë në garën e brendshme për kandidatë në radhët e Partisë Socialiste, duhet të marrin njëherë besimin e grupeve kriminale, e më pas të votuesve të tyre.
Këtë të lë të kuptosh deklarata e fortë e gazetares Kloodiana Lala në emisionin “Të paekspozuarit”, ku zbuloi se një nga personat që pretendon se mund të kandidohet nga Edi Rama në garën për bashkinë e Durrësit më 14 maj, ka fluturuar drejt Dubait për negociata me një emër të njohur të krimit në qytet.
Ky personazh sipas gazetares, kërkonte t’i përmendej emri nga Partia Socialiste, ndaj edhe shkoi vetë në Dubai për të biseduar me një nga bosat e krimit më me influencë në Durrës, për të marrë garancinë se ai do të lobonte për të.
“Unë di një person që nuk është fare në listën e PS për kryetar të bashkisë ka udhëtuar për në Dubai për të marrë garanci nga një personazh i botës së krimit që mund t’i jepte garanci për të qenë në listë si kandidat i mundëshëm për kryetar të Bashkisë. Të bashkisë së Durrësit, por sot nuk është më një opsion.
Njëri që synonte drejtimin e bashkisë ka udhëtuar në drejtim të Dubait dhe ka kërkuar garanci nga një anëtar i grupit kriminal për t’i vendosur veten në listë, por nuk e ka arritur. Pra shkon deri aty. Ka investuar tek maxhoranca dhe ka synuar që të jetë kryetar bashkie, ka kërkuar garanci, pra bota e krimit në Durrës ësstë më fluide. Lëviz sipas interesave. Ju kujtohet 339 se kërkonin kandidatin për deputet X apo Y. E njëjta gjë po ndodh edhe tani”, tha Klodiana Lala.
