Një 54-vjeçar në kërkim për mashtrim me tollona nafte në dëm të disa personave, është arrestuar nga policia e Lezhës.
Policia konfirmoi këtë të Mërkurë se ndaj Gëzim Prengës, banues në Mirditë, ka 4 masa sigurie “Arrest në burg”, për raste të ndryshme mashtrimi. Po ashtu, ai rezulton me precedent të mëparshëm për një sërë veprash penale të tjera.
“Për shtetasin G.P. rezultojnë aktive 4 masa sigurie “Arrest në burg” të caktuara nga gjykatat e Lezhës, Krujës, Tiranës dhe Durrësit, për veprën penale “Mashtrimi”, pasi dyshohet se gjatë periudhës kohore 2021-2023, u ka marrë para që variojnë në vlerat nga 30.000 – 120.000 lekë të rinj, shtetasve të ndryshëm, duke i mashtruar se do t’i pajiste me kupona (tollona) për blerje karburanti për furnizim mjeti me çmime të favorshme, si dhe për ofrimin e shërbimeve të tjera (karrotrec për lëvizjen e automjeteve etj.)”, njoftoi policia.
“Në vijim të verifikimeve në kuadër të operacionit “Tollonat”, rezultoi se 54-vjeçari është shtetas me precedent të mëparshëm kriminal për vepra penale kundër personit, në fushën e qarkullimit rrugor, në atë të organizimit të kundërligjshëm të lojërave të fatit si dhe po për veprën penale të mashtrimit. Materialet procedurale i kaluan Prokurorisë pranë Gjykatës së Rrethit Gjyqësor Lezhë, për veprime të mëtejshme”, shtuan të njëjtat burime.
