Mbrëmjen e sotme policia ka zbatuar një urdhër-arresti të lëshuar nga Prokuroria e Posaçme Kundër Korrupsionit dhe Krimit të Organizuar, për të vënë në pranga kryebashkiakun e Bulqizës, Lefter Alla.
Paraprakisht mësohet se drejtuesit socialist akuzohet për korrupsion dhe abuzim me tenderat publik, ndërsa burime bëjnë me dije se bashkë me të janë shoqëruar edhe disa zyrtarë të Bashkisë së Bulqizës, që kanë qenë anëtarë të komisioneve për tendera publikë.
Urdhër ndalimet për ta janë firmosur nga SPAK, ndërsa hetimet në ngarkim të tyre kanë zgjatur të paktën 6 muaj.
Dyshohet se bashkia e Bulqizës ka firmosur dy tendera mbi 200 mijë euro për asflatime rrugësh. Dyshimet janë se komisioni i ofertave ka skualifikuar ofertat më të mira dhe kanë favorizuar një tjetër që nuk i përmbushte kriteret.
Arrestimi i Allës vjen në një kohë kur kampet politike kanë nisur përgatitjet për fushatën e zgjedhjeve lokale të 14 Majit dhe vetëm 60 ditë mbeten nga votimet, ku shqiptarët do të zgjedhin drejtuesit lokalë në 61 bashki, për një mandate katër vjeçar.
Gjithashtu lajmi për arrestimin e Allës erdhi vetëm dy orë pasi kishte përfunduar mbledhja surprizë e Grupit Parlamentar të Partisë Socialiste, ku Edi Rama u dha porositë e fundit të vetëve për përzgjedhjen e kandidatëve, duke marrë përsipër të vendosë vetë për emrin që do të garojë në Vlorë.
Rama ishte i ashpër me deputetët e tij, të cilëve u kërkoi të dalin në fushatë dhe secili do të mbajë përgjegjësi për zonën e tij elektorale.
Sakaq, nuk dihet nëse Alla do të garonte sërish në këto zgjedhje për logon e PS në bashkinë Bulqizë, por dërgimi i tij pas hekurave kur na ndajnë dy muaj nga data e zgjedhjeve është “një dhimbje koke” më shumë për Ramën.
