Ministri polak i Drejtësisë, Zbigniew Ziobro, është filmuar me një armë në brez gjatë një vizite zyrtare.
Në lidhje me këtë situatë, Ziobro tha se ai kishte marrë një leje për armët vite më parë sepse një drejtues i sindikatës së krimit e kërcënoi atë.
Ziobro u fotografua me armën në brez në momentin kur po vendoste një kurorë në monumentin e ndërtuar në kujtim të atyre që vdiqën në një aksident minierash në Turqi, në momentin kur xhaketën ia mori era.
Kritikët në mediat sociale komentuan se ministri nuk duhet të jetë i sigurt në mbrojtjen që merr si figurë shtetërore, por mbështetësit vërejnë se Ziobro, i cili ka qenë gjithashtu Prokuror i Përgjithshëm, ka marrë kërcënime me vdekje.
Ziobro tha në një konferencë shtypi të martën se ai mori lejen për të pasur një armë pasi u zbulua disa vite më parë se një bos i krimit të organizuar kishte bërë thirrje për vrasjen e tij. Burri, i identifikuar vetëm si Jan S., ndodhet prej disa vitesh në paraburgim dhe gjykimi i tij është duke u zhvilluar.
Ziobro tha se ai ka statusin e viktimës në këtë rast. “Si çdo qytetar, unë kam çdo të drejtë të përdor mjete që garantojnë siguri për mua dhe familjen time”, u shpreh Ziobro.
Në një konferencë të veçantë për shtyp, kryeministri Mateusz Morawiecki tha se të gjithë qytetarët, përfshirë ministrin e drejtësisë, kanë të drejtë të përpiqen të marrin leje për të pasur një armë.
Më herët, Ziobro tha se ai ushtrohet në poligon gjatë fundjavave si hobi. Ai tha se e kishte armën me vete sepse alternativa ishte ta linte në makinë, gjë që nuk lejohet, pasi ai u ndal në ceremoni gjatë kthimit për në Varshavë në fillim të javës.
Ziobro (52 vjeç) është kreu i një partie të vogël në koalicionin konservator në pushtet dhe ka pikëpamje të forta, duke përfshirë mbështetjen për dënimin me vdekje. Ai është autor i ndryshimeve në sistemin e drejtësisë që e kanë vënë Poloninë në një rrugë përplasjeje me BE-në.
