Detaje të reja kanë dalë në dritë për masakrën e “Don Boskos”, ku dy atentatorë që dolën nga një automjet “BMW” zbrazën 23 gëzhoja nga dy kallashnikovë mbi lokalin në pronësi të Ylli Muratit, vëllait të Fatjon Muratit, duke lënë të vdekur banakieren Mimoza Paja dhe të plagosur 5 persona të tjerë.
Teksa policia ka arritur të zbulojë itinerarin e plotë të mjetit tip “BMW” që vjen nga Rinasi 30 minuta para ngjarjes, e më pas digjet pranë fshatit Likmetaj në zonën e Fushë-Krujës, një tjetër detaj i rëndësishëm ka dalë në dritë.
Mësohet se 32-vjeçari Fatjon Murati ka kaluar kufirin e Shqipërisë në datën 19 Janar të këtij viti, madje duke vulosur i pashqetësuar pasaportën e tij sipas sistemit TIMS, edhe pse mbi të rëndonte masa e sigurisë “arrest në shtëpi”.
Të njëjtën gjë besohet se Murati e ka bërë edhe dy ditë para ngjarjes, në datën kur oficerët e policisë bën si zakonisht konfirmimin për zbatimin e masës së sigurisë në vilën e tij, duke u arratisur drejt Prishtinës, e më pas drejt Turqisë.
Sakaq, në raport lexohet se në lokal në momentin e sulmit kanë qenë 9 persona duke përfshirë edhe mbesën 10 vjeçare të viktimës Mimoza Paja. Kjo e fundit në momentin e goditjes ka qenë në këmbë dhe ka marrë një plumb pas shpine në brinjë.
Sipas dëshmive të të pranishmëve në lokal, policia ka mësuar se vëllai i Fatjon Muratit, Ervisi ka qenë duke qëndruar në këmbë së bashku me kushëririn e tij duke ndjekur ndeshjen Juventus-Sampdoria. Xhaxhai i tij i ulur në tavolinë me një nipin e tij dhe tre personat e tjerë në dy tavolina më tej.
Të gjithë dëshmitarët mohojnë të kenë parë autorët dhe theksojnë se kanë dëgjuar vetëm zhurmën e plumbave dhe janë përpjekur menjëherë t’u shpëtojnë atyre.
Ndërkohë, Ervis Murati, i cili dyshohet të ketë qenë edhe shënjestra e mundshme e sulmit, ka deklaruar në polici: “Jam ngritur në këmbë pasi të shtënat kanë mbaruar dhe nuk kam kuptuar kush janë autorët. Mimoza ishte e rrëzuar në tokë e mbuluar me gjak dhe aty kam kuptuar se kishte ndërruar jetë. Kam hipur xhaxhain Shehatin në makinën e Ervinit dhe e kam dërguar në spitalin ushtarak pasi kishte një dëmtim pas koke dhe në shpatull. Pasi kam lënë xhaxhain në spital jam kthyer te vendi i ngjarjes, pra tek lokali dhe kam parë se kishte ardhur policia.”
Edhe të plagosurit e tjerë deklarojnë se kanë gjetur mjete të rastit për t’iu drejtuar Spitalit të Traumës.
