Detaje tronditëse dalin në dritë në lidhje me masakrën në Tiranë, ku Dan Hutra vrau motrën e ish-bashkëjetueses, dhe kunatën e saj dhe plagosi Elena Hysën dhe nënën e saj.
Ish-bashkëjetuesja e tij, Elena Hysa ka folur nga shtrati i spitalit për emisionin “Me zemër të hapur”.
Elena tha se Hutra sapo kishte shkuar në banesën e saj kishte qëlluar motrën dhe kunatën, ndërsa atë e kishte goditur me thikë në faqe. Ajo tha mes të tjerash se Hutra donte të qëllonte dhe djalin.
“Ka qenë aty…e kam parë që ka shkrepur armën drejt meje, pastaj në ato momente ka dalë mami para meje, të më mbronte. E kam shtyrë dhe i dola para mamit. Mbaj mend që na ka sharë, llafe të ndryshme dhe na ka gjuajtur me armë. Donte të qëllonte djalin…e kisha në krah djalin. E kam kapur prej krahu dhe e çova nga dhoma tjetër. Ka ikur me vrap. Më qëlloi me thikë sapo ka hyrë brenda, më qëlloi në faqe. ‘Do ju vras të gjithë’ tha ai.”, tha Elena.
Gjithashtu Elena tha se edhe për borxhin që Hutra i kishte dhënë Marjana Gurakuqit, të dashurës së tij, ishte në dijeni, ndërsa e përshkruan Hutrën si një njeri maniak e të dhunshëm Dan Hutrën.
Pjesë nga intervista:
Elena Hysa: Po të gjithë, mua më ka qëlluar me thikë sa ka hyrë brenda në faqe
Gazetarja: Të tha ndonjë gjë ndërkohë që të qëlloi?
Elena Hysa: Tha do ju vras të gjithëve dhe ka ikur atë moment
Gazetarja: Ndërkohë ai nuk ka kursyer as djalin?
Elena Hysa: Jo
Gazetarja: Po goca e motrës, ku ishte ato momente si shpëtoi?
Elena Hysa: Unë e kam kap e kam çuar nga dhoma tjetër të dy
Gazetarja: çfarë ndodhi, u largua?
Elena Hysa: Po iku, pa gjithë skenën dhe ka ik shumë shpejt.
Gazetarja: Mardhënien me motrat e tij si e ke pasur? Me Hasijen? Të ka përkrahur ke biseduar me te?
Elena Hysa: Shumë të mirë, kam fol po
Gazetarja: Hasija ka fol dhe ka treguar se edhe jeni takuar dhe i ke shprehur se doje te pajtoheshe
Elena Hysa: Po, e vërtetë!
Gazetarja: Ky pretendon se kësaj Marjanës i kishte dhënë lekë borxh, ose i kishte dhënë një shumë të caktuar parash. Ke dëgjuar ndonjëherë në marrëdhënien tuaj?
Elena Hysa: Po e kam dëgjuar, sa e vërtetë është nuk e di.
Gazetarja: Të thënë nga goja e Danit?
Elena Hysa: Po
Gazetarja: Po për çfarë ja kishte marrë, po ju si keni reaguar asaj kohe? Pse kjo femër në jetën tënde kur ai ishte me ty?
Elena Hysa: Ai është maniak
Gazetarja:Që do të thotë?
Elena Hysa: Do të thotë që s’don t’ja di për askënd
Gazetarja:Po në marrëdhënien seksuale, a të ka dhunuar, ishte i dhunshëm?
Elena Hysa: Edhe më ka qëlluar nga një herë, por janë shumë të dhunshëm si fis….
Si ndodhi masakra më 1 mars?
Dan Hutra plagosi fillimisht 40-vjeçaren Marjana Gurakuqi në zonën e Astirit, pasi ajo nuk pranoi t’i jepte një shumë parash që ai i kërkoi. Më pas, me makinën që kishte marrë me qira, shkoi në Paskuqan, aty ku jetonte familja e ish-partneres së tij Elena Hysa. Hapi zjarr duke vrarë motrën dhe kunatën e saj, Mevlute Hysa dhe Hasime Dafku si dhe plagosi vetë Elenën e nënën e saj, Kujtime. Më pas shkoi në Kamëz, në shtëpinë e Etleva Kurtit, duke e qëlluar edhe këtë të fundit për vdekje.
Arratia e Dan Hutrës mori fund pas 7 orëve kërkime. Ai u arrestua nga policia në zonën e Sharrës ku kishte shkuar për të ekzekutuar një person të katërt, Rrahman Sela, por që nuk e realizoi dot. 40-vjeçari është dënuar më parë për përdhunim, vrasje e dhunë në familje. Në gjyq, ai nuk ka shprehur asnjë lloj pendese për krimet e kryera.
