Fatjon Murati, pronari i lokalit në “Don Bosko”, ku mbrëmjen e djeshme ndodhi një masakër pasi dy atentatorë me një automjet tip “BMW” hapën zjarr duke lënë të vdekur banakieren 58-vjeçare Mimoza Paja dhe të plagosur katër persona të tjerë, rezulton se ka qenë në banesën e tij pak orë para se të ndodhte atentati.
Raportohet se ashtu siç e parashikon procedura ligjore për personat, për të cilët Gjykata ka vendosur masën e sigurisë “arrest në shtëpi”, një grup oficerësh policie kanë shkuar dje në shtëpinë e Muratit për të verifikuar nëse ka qenë apo jo në banesë.
Sipas ABCNews, pasi ka firmosur një procedurë të zakonshme për këdo person që është me masë sigurie “Arrest në shtëpi”, Murati në rrethana ende të paqarta për grupin hetimor ka thyer masën e arrestit dhe dyshohet se gjatë pasdites është larguar në Kosovë dhe më pas drejt Turqisë.
Sa i përket zbutjes së masës së sigurisë për Muratin, mësohet se vendimi është marrë nga Gjykata e Shkallës së Parë të Tiranës, në dhjetor të vitit të kaluar.
Dy muaj pas arrestimit dhe me një refuzim nga Apeli për të ndryshuar masën e sigurisë, Murataj është lënë në “arrest në shtëpi” edhe pse u vu në pranga pas zbulimit të një arsenali armësh në një apartament në zonën e Farkës, bashkë me shtetasin Kristjan Gjini.
Ndërkohë lidhur me hetimin për arsenalin e armëve, Prokuroria e Tiranës zbuloi se në një prej kutive ku mbaheshin armët u gjet vetëm një gjurmë gishti e Muratajt dhe për këtë rikualifikoi veprën penale, nga ajo e “mbajtjes pa leje të armëve të kryer në bashkëpunim” në “armë mbajtje pa leje në banesë”.
Mësohet se pas kësaj, gjykata e shkallës se parë ka zëvendësuar masën e sigurisë nga ajo e “Arrestit në burg në “Arrest shtëpiak”.
Dosja ndaj tij ndërkohë kishte kaluar për gjykim, ku ishte pranuar gjykimi i shkurtuar dhe ishte shtyrë seanca për pretencën e Prokurorisë. Pas vendimit të dhënë në favor të tij, Murati qëndronte në një vilë luksoze pranë lokalit të tij, ku edhe ndodhi masakra.
