Një nëndetëse e rrallë, që mbante në bord 2.6 ton kokainë të pastër, është zbuluar në oqeanin Paqësor.
Mediat ndërkombëtare raportojnë se nëndetësja misterioze është rreth 15 metra e gjatë dhe është zbuluar pranë brigjeve të Kolumbisë. Nëndetësja me kokainë me vlerë rreth 80 milionë euro u kap nga marina kolumbiane, ndërsa në të u gjetën edhe katër persona, dy nga të cilët të vdekur.
Autoritetet kolumbiane kanë shpërndarë edhe pamje të momentin kur shkarkojnë nëndetësen e mbushur me kokainë.
Ndërkohë, mediat spanjolle raportojnë se nëndetësja dyshohet se i përkiste Forcave të Armatosura Revolucionare të Kolumbisë (FARC), fraksioni që sfidon shtetin.
Të krijuar në vitin e largët 1964, ky grup me influencë në Kolumbi deri në 2017-n u përpoq të rrëzonte qeverinë dhe të krijonte një shtet komunist dhe kanë qenë përherë të përfshirë në trafik droge, vrasje, rrëmbim e aktivitete të tjera kriminale.
Gjithashtu, mediat kolumbiane kanë raportuar se policia ka zbuluar edhe një laborator të përpunimit të kokainës në një zonë rurale pranë qytetit verior të Santa Martës, ku u gjetën edhe dy ton kokainë.
“Forcat ushtarake gjetën dy person të vdekur, ndërsa dy të tjerë ishin në gjendje të rëndë shëndetësore. Dyshohet se brenda nëndetëses mund të ketë pasur rrjedhje të karburantit. Dy personat u transportuan menjëherë në spital për të marrë ndihmën mjekësore”, ka thënë në një deklaratë Ministria e Mbrojtjes në Kolumbi.
