Telashe për Kombëtaren një javë para grumbullimit të parë nën urdhrat e trajnerit Silvinjo. Berat Gjimshiti ka lënë në mes i dëmtuar ndeshjen mes Napolit dhe Atalantës.
Me dëmtimin e Brojës, Bares, tashmë Gjimshitit dhe portierët të cilët janë pa minuta, ekipi kombëtar ka humbur boshtin e tij, duke qenë se pas dy javësh luhet edhe transferta në Poloni.
I aktivizuar titullar nga Gasperini, Gjimshiti po bënte një paraqitje shumë të mirë, duke mos lejuar Osimhen që të prekte topin dhe duke kontrolluar mirë nigerianin.
Por në minutën e 44-t, pas një përplasje me sulmuesin e Napolit, ai u ul në tokë dhe kërkoi menjëherë zëvendësim. Ai la fushën dhe sipas mediave italiane, ka një problem muskulor në kofshën e majtë. Nuk dihet ende se sa është shkalla e dëmtimit dhe koha e rikuperimit.
Gjimshiti ditën e sotme ka bërë vetëm terapi në palestër, teksa është në pritje të rezultateve të analizave. Thuajse e sigurt është që shqiptari do të qëndrojë pushim një javë, teksa ekziston mundësia edhe për të munguar më gjatë, duke vënë kështu në rrezik duelin ndaj Polonisë që do të luhet pas dy javësh.
