“Krimi në Tiranë ka ndryshuar gjeografi”.
I këtij mendimi është gazetari i kronikës Sokol Bregu, i cili nuk e sheh të çuditshëm faktin që bandat e krimit të organizuar hakmerren ndaj njëra-tjetrës në zona si “Don Bosko” apo “Unaza e Re” duke lënë pas edhe viktima të pafajshme, pasi aty janë investuar miliona euro para të pista në bare, ristorante dhe biznese të tjera nga këta eksponentë.
Bregu duke komentuar ngjarjen e rëndë në “Don Bosko” ku mbeti e vrarë banakierja në lokalin e Fation Muratit dhe 5 persona të tjerë u plagosën, përfshi mbesën 10-vjeçare të viktimës, tha në emisionin “Top Story”se bandat “po përplasen me mënyrën në të cilën janë mësuar të përfitojnë”.
“Vetëgjyqësia vazhdon, për një njeri që i kanë vrarë vëllanë prap porosit nga burgu, të gjithë që kanë një të vrarë në shtëpi do të bëjnë këtë gjë, nuk jam me atë që nuk e kapi polici, e kemi krijuar këtë, “Don Boskon”, Unazën e Re”, dikur vriteshin në Bllok, Rrugën e Durrësit, Rrugën Kavajës, ka ndryshuar gjeografia e krimit, nuk çuditem unë kur them u vranë tre veta në Unazë të re, aty ka vetëm lokale lokale, vijnë nga përfitimet nga droga, do përplasen me mënyrën në të cilën janë mësuar të përfitojnë. Ne e kemi nga natyra me pse më pe ashtu. Cila është mënyra? Duhet rregulluar por jo në një ditë. Mua kjo vrasje më shqetëson, në kohën e komunizimit, 8 vrasje ndodhën në ’89 në Lushnjë, kam qenë në proceset gjyqësore. Krimi nuk sulmohet me një polic, mblidhen 5 ekspertë dhe bëjnë ca strategji, jo si këta që bëjnë ca letra, një strategji. Këta çunat e Londrës pse si kapin?”, tha Bregu.
Më tej, ai befasoi jo pak me një deklaratë me kontekst të fuqishëm për situatën në të cilën ndodhet vendi, duke thënë se ambasada amerikane në Tiranë u jep shtetasve të saj një listë me lokale në kryeqytet, ku nuk duhet të shkelin për asnjë arsye.
“90% e lokaleve në Shqipëri janë në pronësi të trafikantëve, 90% mos më shumë. Çdo shtetas amerikan që vjen në vendin tonë i jepet një listë lokalesh që nuk duhet të shkojnë”, nënvizoi ai.
Madje sipas Bregut një listë e tillë ka ekzistuar edhe për gjyqtarët, dhe ata të cilët nuk e respektuan u përjashtuan nga sistemi me reformën në drejtësi.
“Edhe gjyqtarët kanë një listë ku nuk duhej të shkonin në Tiranë. Një pjesë e madhe që nuk iu bindën dhe humbën Vettingun se shkonin pinin kafe duke e ditur se e kishin listën. Kudo ku ulesh, rrezikohesh. Kjo është historia e shoqërisë shqiptare, s’kanë ku shkojnë, kriminelët apartamente dhe lokale dinë të krijojnë, dy apartamente t’i japin me qira dhe lokale të rrinë me shokët”, deklaroi gazetari.
