Pistë kryesore e hetimit për policinë mbetet e shkuara kriminale e pronarit të lokalit, i cili rezulton se ka qenë në banesë duke respektuar masën e sigurisë “arrest në shtëpi” të vendosur nga Gjykata e Tiranës deri disa ditë më parë dhe më pas dyshohet se është arratisur në rrethana të paqarta drejt Prishtinës, e në vijim drejt Turqisë.
Sa i përket ekzekutorëve, ata janë fiksuar nga një kamerë sigurie në distancë dhe mësohet se një person ka qenë në rolin e vëzhguesit, ndërsa dy të tjerë në rolin e atentatorëve. Dy autorët e sulmit kanë dalë nga automjeti tip “BMW”, që u gjet i djegur në vendin e quajtur ‘Ura e Sulë Meres’ dhe kanë qëlluar me breshëri në drejtim të lokalit të Fatjon Muratit.
Dyshimet janë se lëvizjet e të afërmeve të tij kanë qene nën monitorim të vazhdueshëm, pasi i plagosur mbeti xhaxhai i tij, 50-vjeçari Sahit Murati, që ka marrë dy plumba në shpatull.
Dyshimet se autorët kanë qenë në ruajtje të familjarëve përforcohen edhe prej faktit se në lokal në momentin e sulmit me armë ndodhej edhe vëllai i Fajton Muratit dhe djali i xhaxhait të tij.
Mësohet se vëllai i 32-vjeçarit mund të ketë qenë “shënjestra” e autorëve. Ai vetëm disa ditë më parë ishte kthyer nga Polonia, ku jeton prej kohësh dhe gjendej në lokal në momentin e ngjarjes, por nuk është prekur nga plumbat.
Në vendin e ngjarjes janë gjetur më shumë se 15 gëzhoja kallashnikovi, teksa në hetuesit janë rikthyer sërish paraditen e kësaj të hëne për të kryer matje të tjera në funksion të hetimeve.
Ndërkohë lokali i regjistruar në QKB si bar-kafe ishte vendosur në sekuestro nga Prokuroria e Posaçme që prej muajit tetor, kur u vendos që të konfiskohej pasuria prej 5 milionë eurosh e Muratit dhe familjarëve të tij.
Në brendësi të lokalit, i cili sipas një njoftimi të SPAK mbi sekuestron rezulton të ketë pronar të ligjshëm vëllanë e Fatjon Muratit me iniciale Y.M., duken shenjat e plumbave në xhamat e bërë “shoshë” prej breshërisë.
“Bazuar në nenin 274, paragrafi 1 e 2 të K.Pr.Penale, kërkojmë sekuestrimin e pasurive te paluajtshme: Aktiviteti tregtar i regjistruar si person fizik me NIPT L81619013E, me veprimtari Bar –Kafe dhe aktiviteti tregtar regjistruar si person fizik me objekt veprimtarie, lavazh makinash, në emër të shtetasit Y. M.”, thuhet në njoftimin e SPAK, lëshuar më 14 tetor të vitit të kaluar.
Sakaq, mësohet se vëllai i Fatjon Muratit është një person i njohur për botën e krimit, pasi rezulton të ketë një të shkuar kriminale të theksuar. Ai dyshohet të jetë kreu i një grupi kriminal të trafikimit të lëndëve narkotike.
LEXO EDHE:
“2 qitës një shofer”/ Zbardhet skenari i atentatit në “Don Bosko”
VIDEO – Masakra në Don Bosko, çfarë u gjet në automjetin e përdorur nga autorët (Detaje)
