Një grua dyshohet se ka mbetur e vrarë, ndërsa disa persona janë plagosur nga të shtënat me armë zjarri, mbrëmjen e kësaj të Diele në Tiranë. Ngjarja ka ndodhur në një lokal, afër xhamisë, në zonën e Don Boskos.
Viktima dyshohet se është kamerierja e lokalit, e cila dyshohet se është qëlluar aksidentalisht. Sa i përket të plagosurve, ata raportohet se janë transportuar në Spitalin e Traumës. Gjendja e tyre shëndetësore nuk dihet ende. Raportohet se mes të plagosurve është dhe një fëmijë.
Si shkaqet ashtu sikurse rrethanat momentalisht janë të paqarta, ndërsa në vendin e ngjarjes ka shkuar policia.
Sipas disa raportimeve mediatike, lokali ku ka ndodhur ngjarja është në pronësi të Fatjon Muratit, një personazh i njohur në raportimet e kronikës së zezë.
