Dy ditë pasi një qytetar nga Durrësi denoncoi sorrollatjet që e kanë detyruar të bëjë zyrtarë të Kadastrës në këtë qytet prej 20 vitesh, për të legalizuar banesën e tij, policia ka bërë arrestimin e një prej sekserëve që i kërkonte shuma të ndryshme parash për t’ia bërë të mundur procesin e legalizimit.
Gjithçka nisi me ankesën e qytetarit Selman Ferati në emisionin investigativ “Fiks Fare”, ku tha se ka nisur të ndërtojë një shtëpi banimi në zonën e plazhit në Durrës.
Ferati sqaroi se katin e parë e ka ndërtuar në vitin 1998, ndërkohë të dytin në vitin 2003, por prej kaq vitesh, ai endet në dyert e hipotekës dhe tashmë kadastrës për të marrë dokumentet.
“Më kanë nxjerrë lloj-lloj pretendimi. Të gjithë në atë zonë, komshinjtë e mi, kanë hipoteka. Unë jo. Më dolën njëherë faturat, por atëherë s’kisha lekë dhe e shtyva. Kur mora kredi, më thanë se tani nuk nxjerrim dot fatura të reja”.
Ai zbuloi se “loja” ping-pong që Kadastra e Durrësit kishte bërë me pronën e tij ka futur “në lojë” shumë sekserë, të cilët i kanë marrë dhe ende i kërkojnë mijëra euro për legalizimin e asaj banese, ku jeton Selmani bashkë me fëmijët.
“Më kërkojnë vazhdimisht para’. Dikur dy punonjës të Kadastrës, tashmë një sekser që punon te Ujësjellësi i Durrësit. Sekseri quhet Lulëzim Çyrbja. Disa kohë më parë më mori 1000 euro për të njëjtën procedurë. Më kërkonte edhe 2 mijë të tjera. Por, kur nuk më mbaroi punë, ia rimora lekët. Lulëzimi më dërgoi te një sekser tjetër, që quhet Shkëlqim Xhaja. Ky më kërkoi 6 mijë euro. Pretendonin se njihnin drejtorët e Kadastrës së Durrësit“, zbuloi Ferati.
Pas publikimit të këtij denoncimi, policia ka bërë të mundur pikërisht arrestimin e sekserit Lulzëim Çyrbja, i cili luante rolin e sekserit për të legalizuar banesat, kundrejt shumës 4 mijë deri në 6 mijë euro.
Mbi 53-vjeçarin rëndon akuza “Ushtrimi i ndikimit të paligjshëm ndaj personave që ushtrojnë funksione publike”.
Njoftimi i policisë:
Specialistët për Hetimin e Krimeve të DVP Durrës arrestuan shtetasin L. Ç., 53 vjeç, banues në Durrës.
Mbrëmjen e së enjtes, ky shtetas është shfaqur në një video të transmetuar gjatë emisionit investigativ “Fiks Fare”, duke folur në emër të drejtuesve të Kadastrës së Durrësit, në rolin e sekserit, për të legalizuar banesat, kundrejt shumës 4000 deri në 6000 euro.
Materialet hetimore i kaluan Prokurorisë pranë Gjykatës së Rrethit Gjyqësor Durrës, për veprën penale “Ushtrimi i ndikimit të paligjshëm ndaj personave që ushtrojnë funksione publike” dhe vijon puna hetimore për dokumentimin e plotë të këtij rasti.
