Shpërthimi me tritol që tronditi fshatin Sanxhak të Laçit në orët e para të mëngjesit të kësaj të premte ka shkaktuar dëme të mëdha edhe në bizneset dhe banesat e fqinjëve të shënjestrës, Skënder Lika.
Teksa pamjet nga vendngjarja tregojnë se veranda e banesës së Likës është thuajse e shkatërruar, edhe një nga fqinjët e afërt të tij ka treguar se në banesë ka pësuar dëme që përllogariten në rreth 15 milionë lekë.
Fqinji ka rrëfyer për mediat momentin kur dëgjoi shpërthimin e fuqishëm. Ai u shpreh se po flinte gjumë kur copat e xhamit i ranë në krevat dhe doli me vrap jashtë.
“I kam këmbët ende me gjak, duke ecur nëpër xhama”, u shpreh kushëriri i Skënder Likës.
“Nga ora 3-3:00, po flija gjumë, copat e xhamit më ranë në krevat. Kur dola thashë se ndonjë tërmet, pashë dyert e shkatërruara. Dolën njerëzit ishin mirë ka dashur Zoti. Pashë policinë dhe më thanë që i kishin vendosur tritol kushëririt tim. Kur dola dyert dhe dritaret, çfarë kisha ishin shkatërruar. Tjegullat po ashtu. U frikësova, i kam këmbët gjithë gjak, duke ecur nëpër xhama, se dola të iki nga frika. Vlera e dëmit shkon 15 milionë lekë, do ndërrohet gjithë çatia.
Unë në shtëpinë time, në hesapin tim, të vijë tjetri të bëjë këtë batërdi. Nuk i kam borxh njeri. Kam biznesin, familjen. Vitrinat i ka hedhur në tokë komplet”, rrëfeu ai.
