Greqia po përballet me protesta të dhunshme në çdo qytet të vendit pas tragjedisë më të rëndë në sistemin hekurudhor vendas, ku përplasja e dy trenave në Tempi të Larisas shkaktoi 57 viktima.
Teksa familjarët kanë përcjellë të shtrenjtit e tyre për në banesën e fundit dhe kryeministri Mitsotakis ka kërkuar nga Prokuroria hetime të përshpejtuara për tragjedinë, një mister i madh mbetet fati i 23-vjeçares shqiptare Erieta Molko, që gjendej në vagonin e dytë të “Intercity 62”.
Agonia mbizotëron ende për studenten e Arkitekturës, e cila rezulton e zhdukur pa gjurmë pas aksidentit në Temp. Për momentin janë identifikuar 56 të vdekur dhe vetëm një rast i materialit biologjik, i marrë nga një i afërm i Erietës, nuk është krahasuar.
Sipas shefit të shërbimit mjeko-ligjor në Larisa, Rubini Leontari, shërbimi nuk ka asnjë informacion për shqiptaren.
“Temperatura e krijuar pas përplasjes së trenave, sipas informacioneve të Zjarrfikësve, në pikën ku flaka ishte e verdhë ka qenë afërsisht 1000-1100 gradë Celsius. Kështu që ju mund të kuptoni se kushdo që ishte në atë pikë mund të mos gjendet”, tha Shërbimi Zjarrfikës për OPEN.
24 orë më parë dhe pas një ankese nga familja, zonja Leontari theksoi: “Nuk kemi një trup që i përgjigjet ADN-së së familjes deri më tani. Nëse vajza ishte në qendër të zjarrit, ajo nuk mund të gjendet nddoshta”.
Prindërit e 23-vjeçares me banim në veriun e Greqisë, ndodhen në një situatë dramatike, pasi kemi të bëjmë me një rast që përbën një kampion ADN-je jetime.
Prindërit shkuan në Larisa që në momentin e parë dhe u përpoqën të gjenin gjurmët e saj si në spital ashtu edhe në vendin e tragjedisë.
Por deri më tani askush nuk mund t’u japë atyre ndonjë informacion për fëmijën e tyre. Ata kanë kontaktuar me të që në mbrëmjen e së martës para tragjedisë dhe më pas Erieta thjesht u zhduk.
Duke folur për Star, një mikeshë e studentes së zhdukur ka deklaruar se Erieta ishte në vagonin e 2 dhe ishte nisur nga Athina.
“Ajo ishte me një çift tjetër miqësor të moshës së saj. Ata nuk mbijetuan. Emri i saj nuk ishte në listën e spitaleve në radhë të parë. Nuk mund ta besoj që humbi në këtë mënyrë”, tha ajo.
“Ishte një vajzë shumë e mirë dhe me prirje artistike. Ajo i kishte hyrë pikturës, ishte një engjëll i vogël, e butë, e ëmbël. Jemi shumë keq”, shtoi mikesha e 23-vjeçares.
Laboratorët e mjekësisë ligjore të Policisë Helenike kanë përfunduar sakaq analizat laboratorike të mostrave të dhëna nga familjarët e viktimave të tragjedisë në Tempi.
Procesi “identifikoi 56 persona të vdekur”, siç thuhet në deklaratën e policisë, një numër ky që rrjedh nga analiza krahasuese e 58 materialeve biologjike nga familjarët e viktimave apo sendet e tyre personale dhe 108 mostra të marra nga kufomat apo pjesët e trupit.
Policia saktëson se “të 108 mostrat e trupave apo pjesëve të trupit të marra korrespondojnë me 56 të vdekurit”. “Vetëm një rast me material biologjik, i marrë nga një i afërm i një personi të zhdukur, nuk ka rezultuar në përputhje pasi nuk është gjetur asnjë mostër përkatëse”, raporton policia.
Së fundi, për kampionin e fundit që ka të bëjë me një të huaj të zhdukur, është marrë një mostër nga Holanda, e cila është dërguar në Greqi.
