Një i ri shqiptar, i cili u arrestua më 6 dhjetor në “Middleton Road” të qytezës Oldham, pasi kishte konvertuar banesën në një fermë kanabisi, ka dalë para gjykatës në Britaninë e Madhe për t’u njohur me dënimin e tij.
Mediat angleze raportojnë se 27-vjeçari Diamont Bunguri u dënua me gjashtë muaj burg në Gjykatën e Lartë të hënën (6 mars) pasi u deklarua fajtor për prodhimin e kanabisit.
Prokurori Simon Barrett i tha gjykatës se policia hyri në një pronë që ishte konvertuar plotësisht në një fermë kanabisi dhe aty gjeti Bungarin, i cili u arrestua pasi u identifikua si banori i vetëm dhe u konstatua se kishte hyrë në mënyrë të paligjshme në Britani.
Dhomat e katit të poshtëm, duke përfshirë kuzhinën dhe dhomën e ngrënies, dhe dhomat e gjumit në katin e sipërm përmbanin të gjitha bimë kanabisi që ishin vendosur në një “organizim të sofistikuar” me llamba, ndërsa energjia elektrike ishte përshtatur që të vidhej nga rrjeti.
Një total prej 156 bimësh u gjetën në adresë me një vlerë rruge nga 124,000 deri në 156,000 £. 27-vjeçari kishte në posedim çelësat e pronës, ushqime, kartën e identitetit shqiptar dhe një smartfon.
Prokurori Barrett i tha gjykatës se meqenëse Bungari ka hyrë ilegalisht nga Shqipëria, “dihet pak për të” dhe nuk ka të dhëna për ndonjë dënim të mëparshëm.
Ndërkohë, Bungari tha se veprimet e tij ishin për shkak të pozicionit në të cilin ai u gjend, pasi rrëfeu se kishte hyrë në Britaninë e Madhe në tetor 2022 me gomone për të kërkuar azil dhe për të punuar në mënyrë legjitime.
27-vjeçari i tha gjykatësit se nisi një punë në ndërtim, por që zgjati vetëm disa ditë. Pasi mbeti pa para dhe pa vend për të qëndruar, atij iu ofrua të punonte si “ujitës i bimëve” dhe me keqardhje ra dakord pasi nuk kishte zgjidhje tjetër.
“I kam ujitur bimët sipas udhëzimeve. Isha i frikësuar nga pasojat nëse nuk do të ndiqja udhëzimet”, shtoi ai.
Bungari ndodhej në “shtëpinë e barit” për 10 ditë përpara se policia të bastiste adresën. Avokatja e tij e mbrojti duke përdorur kohën e shkurtër në banesë si argument për të kërkuar lirinë e tij. Ajo gjithashtu tha se Bungari kishte udhëtuar në Mbretërinë e Bashkuar për të “gjetur punë dhe për të ndihmuar familjen e tij dhe nuk kishte asnjë qëllim të përfshihej në veprimtari kriminale“.
Ajo shtoi se 27-vjeçari ishte përfshirë për shkak të “naivitetit” të tij dhe është “jashtëzakonisht i penduar”.
