Detaje të reja kanë dalë në dritë për ngjarjen e rëndë që ndodhi në Fier në mesditë, ku një 32-vjeçare qëlloi me thikë bashkëjetuesin e saj.
Plagosja që ndodhi në lagjen “Liri” ka për protagoniste Arinarda Asllanin, nënë e 3 fëmijëve
Ajo goditi me thikë thikë bashkëjetuesin Arjan Jorgati pas një debati që patën në banesë, e që nisi prej faktit se 33-vjeçari kishte shkuar i dehur në shtëpi.
“Specialistët për Hetimin e Krimeve të Komisariatit të Policisë Fier arrestuan në flagrancë shtetasen A. A., 32 vjeçe, banuese në Fier, pasi gjatë orëve të para të mëngjesit, pas një konflikti për motive të dobëta, në banesën e saj, ka goditur me mjet prerës (thikë), bashkëjetuesin, shtetasin A. J., 32 vjeç, i cili është dëmtuar lehtë dhe ndodhet në spital, në kujdesin e mjekëve”, njoftoi policia.
I plagosuri u nis me urgjencë drejt spitalit të Fierit, ku mësohet se ndodhet jashtë rrezikut për jetën.
Por kjo nuk është hera e parë që Arinarda arrestohet nga policia për një ngjarje të tillë. Mësohet se edhe në 2013, 32-vjeçarja është ndaluar nga policia pasi ka plagosur po me thikë ish-bashkëshortin e saj.
Ndërkohë, materialet për ngjarjen e sotme i kaluan Prokurorisë për veprime të mëtejshme, për veprat penale “Dhuna në familje” dhe “Plagosje e lehtë me dashje”.
