Mbledhja e Grupit Parlamentar dhe Kryesisë që u thirr këtë të hënë nga Enkelejd Alibeaj vijon prej mëse tre orësh në një nga hotelet e Tiranës, në prezencën e 18 deputetëve.
Nga mbledhja sinjalet janë që të gjithë kërkojnë një bashkim të Partisë Demokratike për të dalë me kandidatë unik në zgjedhjet e 14 majit përballë mazhorancës.
Edhe vetë Enkelejd Alibeaj në nisje të fjalës së tij shprehu hapur një thirrje drejtuar kandidatëve të dalë nga procesi i Primareve për të hyrë në garë nën siglën dhe logon e Partisë Demokratike, por përjashtoi një bashkëpunim me Sali Berishën.
“Në funksion të bashkimit, duke konsideruar realitetet që kanë prodhuar primaret e mëparshme të PD-së në prag të zgjedhjeve të vitit 2021, votimet me primare nga grupi i Rithemelimit dhe kandidime të tjerë, i propozoj kësaj kryesie hapjen në princip ndaj gjithë prurjeve në fjalë, në mënyre eksplicite ndaj kandidatëve demokratë të primareve gjithashtu, me synim daljen me kandidatë unik”, u shpreh Alibeaj.
Duket se ndryshe nga Alibeaj mendojnë deputetët e tjerë të cilët thirrjet për bashkim i kanë më të qarta dhe gjithëpërfshirëse, duke kërkuar tryeza bisedimi me Berishën.
Deputeti Gazmend Bardhi u shpreh se duhet të gjendet një zgjidhje e menjëhershme dhe kërkoi nga grupimi “Alibeaj” të ofrojnë çdo gjë në emër të unifikimit për të dalë me kandidatë më 14 Maj.
“Të gjendet zgjidhje, opozita duhet të dalë me kandidatë unik. Secili prej nesh ka bërë betejë për ta bërë partinë Demokratike fituese, alternativë qeverisëse. Gjatë kësaj kohe ka nevojë vetëm për maturi. Gjuha e urrejtjes nuk mund të ketë vend tek ne. Jemi 70 ditë larg nga zgjedhjet. Fokusi ynë duhet të jenë vetëm zgjedhjet e 14 Majit. Ne duhet të bëjmë çdo gjë që kemi në dorë, të ofrojmë çdo gjë, që të gjendet zgjidhje dhe PD e opozita të dalë me kandidatë të përbashkët”, tha Bardhi.
Ndërkohë, deputeti Dashnor Sula ka mbështetur qëndrimin e Bardhit dhe ka shkuar edhe më tej duke kërkuar që të mandatohet një grup që të rinisin negociatat me Sali Berishën.
“Mbështesim idenë e kandidatëve të përbashkët dhe e vlerësoj ftesën e Alibeaj. Partia menjëherë pas zgjedhjeve të hyjë në proces zgjedhor në një afat kohor brenda 3 muajve pas ditës së zgjedhjeve të 14 majit. Kryetari në detyrë të ndajë detyrën nga Kryetari grupit dhe një deputet tjetër të drejtojë grupin parlamentar. Të mandatohet një grup negocimi me palën tjetër”, mësohet të ketë thënë Sula në mbledhjen, rezultatet e së cilës pritet të bëhen të ditura për mediat nga Alibeaj në përfundim të saj.
Propozimi i Sulës ishte disi i pritshëm, pasi ai është ndër të paktët deputetë që e ka shprehur hapur pas vendimit të Gjykatës së Apelit se bashkimin e Partisë Demokratike e ka 90% në dorë lideri i saj Sali Berisha.
“Ai burrë aty është babai ynë, lideri ynë historik”.
Kështu u shpreh deputeti demokrat për të treguar peshën e Sali Berishës në procesin e zgjidhjes së krizës në Partinë Demokratike gjatë një interviste në emisionin “Review”.
Sula gjithashtu pranoi se i vetmi që mund të bashkojë dy palët në PD është ish-kryeministri Berisha dhe gjithë të tjerët sipas tij kanë vetëm 10% influencë në marrjen e një vendimi për të shkuar me 1 kandidat në zgjedhjet e 14 majit.
“Unë jam politikan modest dhe them se 90% në dorë për bashkimin e PD-së e ka Sali Berisha, ne të tjerët 10% kemi. Të jemi të qartë, kush mendon ndryshe nuk merr vesh nga politika. Ai burrë aty është babai ynë, lideri ynë historik, ka aq shumë ndikim te kushdo. Një lëvizje gishti të bëjë ai për qëndrimin e tij, të gjithë ata që janë pas tij nuk thonë gjysmë fjale. Është ndryshe te ne që jemi kokë më vete dhe nuk pyesim kur mendojmë ndryshe. Kurse ata shohin të gjithë dhe mendojnë të gjithë njësoj, siç mendon Sali Berisha. Siç e kam parë dhe unë dhe siç e shoh unë tani, e ka në dorë Sali Berisha”, tha Sula dy ditë më parë.
