Ashtu siç ishte paralajmëruar prej të premtes nga përfaqësuesi ligjor Indrit Sefa, pak pasi Gjykata e Apelit vendosi të dërgojë për rigjykim në Shkallën e Parë çështjen e vulës së Partisë Demokratike, grupi “Alibeaj” ka depozituar sot në KQZ kërkesën për t’u regjistruar në zgjedhjet e 14 majit.
Ishte vetë Sefa ai që depozitoi kërkesën për regjistrimin në KQZ të këtij grupimi politik për zgjedhjet lokale, pak orë pasi e njëjta kërkesë ishte depozituar edhe nga PD e drejtuar nga Sali Berisha.
Gjatë fjalës së tij për media Sefa pohoi se praktika e regjistrimit ishte njësoj si partitë e tjera.
“Ta vlerësojë situatën komisioneri, është praktikë e përcaktuar në Kod. Kjo është një praktikë e ndjekur nga të gjitha partitë politike”, tha Sefa.
Ndërkohë, dita e sotme është afati i fundit për regjistrimin e partive në KQZ.
