Gazetari Spartak Koka ka publikuar sot në “Opinion” pamjet e regjistruara nga një kamera sigurie pranë shtëpisë së familjes Hysa në Paskuqan, ku duket “killer” Dan Hutra duke ekzekutuar me breshëri kallashnikovi gratë e familjes Hysa.
Në video shihet momenti kur 40-vjeçari që i mori jetën dy grave, Mevlute Hysës 30 vjeçe dhe Hasime Dafkut 30 vjeçe (motra dhe kunata e ish-partneres së tij, Elena Hysa) mbërrin para banesës së tyre me makinën “Benz C Class” dhe hyn më pas në banesë.
E gjithë ngjarja siç mund të shihet edhe në video, ndodh në 5 minuta e 30 sekonda.
Pasi ndalon makinën pranë shtëpisë, Hutra heziton për pak çaste, pasi pranë kalojnë fëmijë të shoqëruar nga prindërit, sepse shumë pranë banesës së familjes Hysa ndodhet një shkollë 9-vjeçare,
Më pas, me kallashnikov në dorë ai futet brenda shtëpisë dhe pas 2 minutave, hap zjarr. Breshëria e plumbave dëgjohet në të gjithë lagjen, ndërsa kalimtarët, mes të cilëve edhe fëmijë, largohen me shpejtësi.
Dinamika e ngjarjes, minutë pas minute
Ora 12:34:13– Pranë makinës së Dan Hutrës afrohet një automjet tjetër, i cili ndalon për disa sekonda. Mbetet e paqartë nëse kanë biseduar.
Kjo makinë kthehet mbrapsht me indietro dhe largohet.
Ora 12:35:16 – Dan Hutra del për herë të parë nga makina.
Ora 12:35:27 – Pranë makinës së Dan Hutrës kalojnë disa fëmijë të vegjël.
Ora 12:36:52 – Futet tek shtëpia e familjes Hysa.
Ora 12:37:09 – Hyn brenda në oborrin e banesës së familjes Hysa.
Ora 12:39:03 – Dëgjohet e shtëna e parë.
Ora 12:39:17 – Dëgjohet e shtëna dytë.
Pas një pauze të shkurtër dëgjohen 4 breshëri.
Ora 12:39:43 – Del nga shtëpia e familjes Hysa.
Ora 12:59:54 – Dëgjohen për herë të parë fenelinat e policisë.
