“Nuk jam penduar, i vrava se desha!”.
Kështu ka deklaruar para hetuesve në Drejtorinë e Policisë së Tiranës, Dan Hutra, pak minuta pasi u shfaq tepër gjakftohtë kur dy policë e nxorën nga makina me pranga në duar për ta futur në qelitë e paraburgimit.
Sipas gazetarit të kronikës, Spartak Koka, 40-vjeçari nuk ka shprehur pendesë për vrasjen e tre grave dhe plagosjen e tre të tjerave ditën e sotme në Tiranë.
Në detajet e reja që gazetari ka zbuluar në emisionin “Opinion” në lidhje me masakrën e Hutrës, mësohet se 40-vjeçari gjithashtu ishte nisur drejt Sharrës për të kryer vrasjen e katër dhe objektivi do të ishte Rrahman Sela për të cilin ka thënë se është përgjegjës për vrasjen e të atit.
“Synimi ishte që të futej edhe tek shtëpia e Rrahman Selës, që nuk ka lidhje, që nuk ka pasur asnjë konflikt të mëparshëm me të, por që i ishte fiksuar dhe donte të kryente edhe këtë vrasje. Pra synimi i tij pse ka ardhur në znën e Sharrës dhe të Vaqarrit, ka qenë vetëm për këtë qëllim”, tha Koka.
Një banor i zonës, i cili identifikoi Hutrën rreth 200 metër larg banesës së objektivit Sela rrëfeu për gazetarin edhe skenën kur në vendngjarje mbërriti policia dhe arrestoi 40-vjeçarin.
“Ishte ulur këtu, erdhi policia, u thashë ja ku e keni. Fiks këtu, armën e kishte në dorë. U çua dhe ngrejti duart lart dhe u tha po të doja t’ju hiqja qafe do u hiqja. në se dija se ka kallash, se s’vija fare lart. Do u hiqja të tërë tha po unë s’kam punë me ju, dua të vras edhe një njeri tjetër. Kush është i thanë, Rrahman Sela tha, i cili është banor i lagjes tone”, ka rrëfyer dëshmitari me iniciale A.P. për gazetarin.
Ndërkohë gjithashtu mësohet se ish-bashkëshortja e Hutrës, Elena Hysa, e cila mbeti e plagosur nga goditjet me thikë dhe plumbat e kallashnikovit në oborrin e banesës së saj, në fillimet e raporteve të tyre nuk e dinte që 40-vjeçari kishte vrarë gruan e tij të pare në vitin 2007.
“Bashkëjetuesja nuk e dinte që ai kishte vrarë gruan. Ai kishte dyshime që fëmija nuk ishte i tij. Vajza i ka thënë, që kur të lindë fëmija do ta provosh me ADN. Më pas, edhe nga burgu i kishte telefonuar duke i thënë: Tërhiëq denoncimin, do jetojmë bashkë. Sot i ka gjetur të papërgatitura të gjitha gratë”, tha Spartak Koka.
