Shqipëria hyri në muajin mars të vitit 2023 me një masakër të denjë për filmat me personazhe “serial killer” ku protagonist është 40-vjeçari Dan (Ramazan) Hutra, i cili me një kallashnikov dhe një thikë, vrau tre gra dhe plagosi tre të tjera në tre lokacione të ndryshme, në harkun kohor të 30-40 minutave.
Të gjitha lokacionet i lidh me Hutrën vetëm një gjë, lidhjet e dashurisë që ai ka pasur me to.
Ngjarja 1 – Dinamika e ngjarjeve të sotme është e tillë që, “Killeri” me “Benz-in” C Class” me ngjyrë të zezë e nisi sulmin e tij ndaj ish të dashurave dhe ish-gruas, duke shkuar fillimisht në zonën e “Astirit”, ku në orën 12:15 përdori një thikë për të kërcënuar e kërkuar para nga 40-vjeçarja Marjana Gurakuqi.
Ajo ka rrëfyer para grupit hetimor se ajo ka pasur njohje të mëparshme me autorin. Ky i fundit i ka shkuar në biznesin ku ajo punonte në ‘Astir’ dhe i ka kërkuar lekë, por sipas gruas, ajo ka refuzuar që t’i jepte. 40-vjeçarja gjithashtu ka zbuluar se Dan Hutra i merrte shpesh herë lekë borxh dhe fakti që ajo refuzoi t’i jepte sot, ka bërë që ai ta plagosë me thikë. Fillimisht Gurakuqi nuk ka bërë kallëzim për plagosjen, por kur ka shkuar në spital mjekët kanë njoftuar policinë dhe ajo e ka pranuar se me thikë e plagosi 40-vjeçari që vijon të mbetet në arrati.
Ngjarja 2 – Pasi plagosi me thikë ish të dashurën e tij në “Astir”, Dan Hutra nuk ka vonuar shumë dhe ka realizuar sulmin me kalllashnikov mbi banesën e familjes Hysa në Paskuqan, ku gjendej ish-bashkëshortja e tij Elena Hysa (35 vjeçe). Rreth orës 12:30, Hutra shkoi në shtëpinë e ish-partneres, e cila kishte urdhër mbrojtje ndaj tij, duke qëlluar fillimisht me armë mbi ish-kunatën e tij, Mevlute Hysa (30 vjeçe) duke e lënë të vdekur në vend.
Më pas me gjakftohtësi të plotë ai qëlloi me armë dhe me thikë ish-gruan, Elena Hysa, në sy të fëmijës së tyre të mitur (1 vjeç) që për fat të mirë i shpëtoi plumbave.
Por 40-vjeçari nuk është mjaftuar me kaq pasi ka vijuar të qëlloi me armë ndaj ish-vjehrrës së tij Kujtime Hysa (60 vjeçe) të cilën e la të plagosur dhe mbi nusen e vëllait të ish-gruas, 30-vjeçaren Hasime Dafku, e cila mori plagë të rënda që i shkaktuan vdekjen.
Ngjarja e tretë – Pak minuta më pas në Kamzë, në rrugën “Besëlidhja” Dan Hutra ekzekutoi 31-vjeçaren Etleva Kurti, e cila ndodhej në oborrin e shtëpisë së saj, ku jetonte me nënën.
Vëllai i viktimës, Vladimir Kurti, tregoi nga burgu i Drenovës se autor është Dan Hutra, pasi është kërcënuar disa herë nga ai.
Sipas Vladimir Kurtit, 40-vjeçari e kërcënonte me jetë në burg dhe madje ka paguar për t’i ekzekutuar nënën dhe motrën në atentate që më pas nuk janë realizuar.
“Kemi pasur përplasje në burg me të. Ishte tip agresiv. Ai kishte paguar dy tre herë për të vrarë motrën, por e kanë refuzuar… ka tentuar të më vrasë edhe mua në burg, edhe motrën time”, ka thënë Vladimir Kurti.
Ka qenë dëshmia e një 6-vjeçareje e cila ka bërë gjithashtu policinë të besojë se Dan Hutra është autori. Mësohet se 6-vjeçarja ka parë të gjithë skenën dhe ka deklaruar se autori ka qenë me makinë të zezë dhe tullac.
Hutra dyshohet se ekzekutoi Etleva Kurtin pasi ka pasur nje histori dashurie me të. Mësohet se e reja e braktisi kur ai ra në burg për vrasjen e gruas së tij të parë.
Kujtojmë se 40-vjeçari, me precedentë të shumta penale, kishte dalë nga burgu më 16 shkurt në rrethana të paqarta pasi Gjykata e Apelit të Tiranës më 14 shkurt të këtij viti kishte vendosur të linte në fuqi masën e sigurisë “arrest me burg” për 40-vjeçarin për “Dhunë në familje”.
Ndërkohë, tashmë pasi vrau tre gra dhe plagosi tre të tjera në hrakun kohor të pak minutave Dan Hutra vijon të mbetet prej më shumë se 5 orësh në arrati dhe Policia e Shtetit ende nuk ka rënë në gjurmët e tij.
