Kombëtarja shqiptare U-19 ka nisur dje një grumbullim 3-ditor me 23 lojtarë, të cilët do të testohen nga stafi teknik, që po përgatitet për të krijuar bazën e skuadrës për miqësoret e radhës dhe eliminatoret e Europianit të kësaj grupmoshe.
Ndërkohë që trajneri Armando Cungu ka shpallur edhe listën e futbollistëve për këtë grumbullim. Një pjesë e mirë e lojtarëve të ftuar vijnë nga jashtë, Gjermania, Spanja, ndërsa ka edhe një lojtar që vjen nga Kosova. Gjithashtu, në këtë grup janë edhe disa lojtarë, të cilët kanë qenë pjesë e Kombëtares U19 e që aktivizohen kryesisht me klube të kampionatit shqiptar.
Pa paragjykuar asnjë prej futbollistëve, është disi i çuditshëm fakti që skuadra e Apolonisë, e cila kryeson kampionatin e moshës U19, dhe Partizani që ndodhet i treti, nuk kanë asnjë lojtar në këtë listë, ndërkohë ekipe që renditen në fund të renditjes si Internacional, përfaqësohen me tre lojtarë, pa i hequr meritat asnjërit prej tyre. Kombëtarja U-19 do të luajë në mars dy miqësore me Maltën në transfertë.
