Prezenca e “shtëpive të barit” është kthyer në një problem shqetësues në Shqipëri. Jo pak herë grupet kriminale bashkëpunojnë me Policinë e Shtetit madje edhe me punonjës të OSHEE të cilët kundrejt ryshfetit mbyllin sytë përballë fenomenit të kultivimit të kanabisit nëpërmjet llampave.
Tashmë është kthyer në normalitet pasi çdo dy vite kur zhvillohen zgjedhjet në Shqipëri lulëzon kultivimi i kanabisit çka të shton akoma edhe më shumë dyshime se lekë të pista përdoren masivisht për të blerë vota në elektorat.
Mesa duket thika ka shkuar në “palcë”, prandaj drejtori i Përgjithshëm i Policisë së Shtetit, Muhamet Rrumbullaku ka dhënë disa porosi për strukturat policore, me qëllim parandalimin e kultivimit të bimëve narkotike.
Rrumbullaku iu dha porosi drejtorëve të qarqeve dhe atyre të kufirit, për të kontrolluar ambientet e mbyllura të dyshuara për kultivim të kanabisit, për kontroll të përjavshëm të terrenit, për kontrolle në bazë të analizës së riskut në pikat e kalimit kufitar dhe për patrullime të shtuara në kufirin tokësor dhe në atë detar.
Njoftimi i plotë nga policia:
“Drejtori i Përgjithshëm i Policisë së Shtetit, Muhamet Rrumbullaku ka nxjerrë një urdhër për vartësit e tij në funksion të parandalimit të kultivimit të bimëve narkotike kanabis.
Porosia u drejtohet drejtorëve të policisë në qarqe dhe atyre të kufirit, për të kontrolluar ambientet e mbyllura të dyshuara për kultivim të kanabisit, për kontroll të përjavshëm të terrenit, për kontrolle në bazë të analizës së riskut në pikat e kalimit kufitar dhe për patrullime të shtuara në kufirin tokësor dhe në atë detar.
Drejtori i Përgjithshëm, porosi të gjitha strukturave policore:
-Intensifikoni kontrollet në terren dhe në ambiente të mbyllura;
-Mblidhni informacion, duke bashkëpunuar me qytetarët dhe agjencitë ligjzbatuese, për personat me tendencë në fushën e kultivimit dhe trafikimit të lëndëve narkotike;
-Kontroll të përjavshëm të territorit, me grupe kontrolli dhe jo vetëm përgjegjësi e spz-ve, por e tërë strukturës policore në zonë;
-Organizoni grupe kontrolli të përbashkëta, me të gjitha institucionet që i ngarkon ligji;
-Kontrolle të imtësishme në pikat e kalimit kufitar, në kufirin tokësor dhe në atë detar, për parandalimin e futjes në Shqipëri, të farave të kanabisit dhe për parandalimin e krimeve ndërkufitare, në veçanti tentativën për trafikim të lëndëve narkotike;
-Intensifikoni bashkëpunimin me partnerët, në nivel vendor, rajonal dhe qendror, duke organizuar patrullime të përbashkëta, si në det ashtu edhe në tokë, për të parandaluar dhe goditur krimet ndërkufitare.
-Bashkëpunoni me OSHEE-në në qarqe, për të evidentuar lidhjet e paligjshme të energjisë elektrike.
-Në rast se nga agjenci të tjera ligjzbatuese, do të konstatohen bimë narkotike të kultivuara në terren të hapur apo në ambiente të mbyllura, përgjegjësia do të jetë mbi zinxhirin drejtues të drejtorisë dhe të komisariatit përkatës.”
