Anëtari i pestë i një bande “skifterësh” shqiptarë që vepronte në rajonin e Lombardisë në Itali, është dënuar me më shumë se 8 vite burg nga Gjykata e Verçelit.
Sipas mediave lokale, Briland Thani u dënua me tetë vite e pesë muaj burg dhe 2700 euro gjobë pasi gjykata pranoi akuzat e ngritura nga prokuroria për grabitje, armëmbajtje pa leje, shitje të sendeve të vjedhura dhe lëndime të rënda personale.
23-vjeçari nga Shkodra ishte anëtar i një grupi të rrezikshëm grabitësish që kishte terrorizuar zonat midis Lombardisë dhe Piemontes.
Kreu i grupit ishte Kristjan Mehilli, i dënuari me burg që u arratis nga qelia natën e ndërrimit të viteve, por u arrestua sërish në Holandë.
Bashkëpunëtorët e Mëhillit përveç Briland Thanit ishin Çesk Thani, Augustin Pjetergjokaj dhe Kristjan Keci.
Një nga grabitjet më të bujshme të “skifterave” shqiptarë ishte ajo që u krye në Cella Monte ndaj sipërmarrësit të verërave Riçardo Coppo, por edhe një tjetër grabitje në Moretta.
Sipas prokurorisë së Vercellit, anatëri i pestë i bandës ishte pikërisht Briland Thani, i zbuluar falë përgjimeve telefonike. Thani u arrestua nga policia shqiptare më 10 janar 2021 dhe u ekstradua në Itali.
