Vetëm disa orë ka zgjatur “arratia” e një 24-vjeçari që shkaktoi një aksident masiv mbrëmjen e djeshme mbi urën e “Vasil Shantos” në Tiranë, pasi u përplas me tre automjete të tjera.
Menjëherë pas aksidentit 24-vjeçari me iniciale A.Q (banues në Has) u arratis nga vendi i ngjarjes, duke lënë pas pesë persona të plagosur.
“Një automjet me drejtues ende të paidentifikuar (larguar nga vendi i aksidentit), ka përplasur automjetet me drejtues shtetasit E. M., A. P., dhe A. M. Si pasojë e aksidentit janë dëmtuar drejtuesi i automjetit shtetasi E. M., dhe pasagjerët e automjeteve, shtetasit A. S., J. Q., A. P., dhe E. M., të cilët ndodhen në spital, nën kujdesin e mjekëve, jashtë rrezikut për jetën”, njoftonte policia pas ngjarjes.
Sakaq mesditën e sotme, blutë e kryeqytetit kanë njoftuar se i riu përgjegjës për aksidentin është vënë në pranga.
“U arrestua A. Q., 24 vjeç, banues në Has, Kukës, pasi duke drejtuar automjetin, te “Komuna e Parisit”, ka goditur 3 automjete të tjera. Si pasojë e aksidentit kanë mbetur të dëmtuar 3 drejtuesit e automjeteve dhe një pasagjere, të cilët ndodhen jashtë rrezikut për jetën”, reagoi policia.
Grupi hetimor po punon për sqarimin e rrethanave të aksidentit.
