Dënimi me 2 vjet e 8 muaj heqje lirie dhe pagesa e një gjobe 1200 euro, përveç shpenzimeve ligjore, u la në fuqi nga Apeli për një “skifter” shqiptar, i cili në gusht të 2020 kishte tentuar të vidhte një shtëpi në Polla të Italisë.
Gjykata e Apelit të Potenzës shpalli të papranueshëm ankimimin e 30-vjeçarit Lefter Semini kundër dënimit me të cilin e kishte njohur më 25 janar 2021 Gjykata e Lagonegro, duke e bërë përgjegjës për tentativë grabitje të rëndë.
Grabitja për të cilën shqiptari është dënuar, është realizuar në 2020 kur Lefteri së bashku me një bashkëpunëtor kishin hyrë në një shtëpi në Polla.
Të dy janë habitur nga pronarët, të cilët në momentin e ngjarjes ndodheshin me fqinjët e tyre dhe kishin dyshime për disa zhurma që vinin nga shtëpia e tyre. Hajdutët, të zënë në befasi, tentuan të arratiseshin por vetëm bashkëpunëtori i Lefterit ia doli mbanë.
Më pas 30-vjeçari, në tentativë për t’iu ikur pronarëve të shtëpisë, ka nisur të hedhë sende drejt personave që kishin ardhur dhe ka tentuar të arratiset duke u hedhur nga ballkoni, por mbeti i plagosur.
Në përfundim të dënimit, avokati i 30-vjeçarit kishte bërë ankesë, por gjyqtarët i konsideruan të papranueshme arsyet e paraqitura, duke konfirmuar kështu dënimin e ankuesit, plus pagesën e 3000 eurove në favor të Fondit të Gjobave.
