Eksperti i kriminalistikës Ervin Karamuço ka zbuluar sot detaje të reja nga vdekja e veshur me mister e kenianes 22-vjeçare Joy Aoko, e cila ndërroi jetë pak ditë më parë në një spital në Kenia.
Teksa në Shqipëri nuk ka ende asnjë person të ndaluar për dhunimin barbar të së resë që ishte e punësuar në një kazino në Tiranë, Karamuço, i ftuar në emisionin “Breaking” tha se ka dyshime të fortë që një politikan shqiptar të jetë i përfshirë në këtë ngjarje.
“Ky është një lajm që ka dalë nga gazetarë investigativ. Flitet për familjarë të një politikani që mund të jenë të përfshirë. Unë e kam sjellë si një pistë e mundshme. Është vonuar procedimi penal, ngjarja nuk është bërë publike. Për kenianen kemi publikimin e një gazetareje shqiptare në Britani që e beri publike dhe ngjarjen”, u shpreh ai.
Hetimet për këtë ngjarje sipas ekspertit bëhen të vështirë, pasi çështja u zbulua vonë dhe shumë prova janë fshirë, por nuk mohohet nga hetuesit që dhunimi që nisi si sulm seksual përfundoi me një tentatië për ta shitur ngjarjen si vetëvrasje nga ana e 22-vjevçares.
“Kemi humbur prova të rëndësishme nga vonesa. Kemi humbur telefonatat, të dhënat e telefonit, dëshmitarë të mundshëm. Pista e parë është një sulm nga 1 ose disa persona që e njihnin viktimën. Sulm që ka nisur si seksual dhe më pas fizik, dhe e hodhën nga ballkoni që ta bënin si vetëvrasje. Edhe shoqet e saj kanë pasur problem”, deklaroi Karamuço.
Më tej ai shtoi se “sot ka të dyshuar për të cilët po mblidhen prova”.
“Mund të jenë shoqërues të saj, një lidhje e dështuar pra ish-partnerë, shoqe të saj etj. Edhe puna që ajo bënte, celularët që ajo përdorte mund të ishin bërë backup, por ka kaluar shumë kohë. Pretendohet që mund të ketë qenë përdoruese e drogës, alkoolit por në analizat e trupit nuk kanë dalë gjurmë, që dmth mund ti ketë sjellë dikush tjetër në dhomën e saj”, shtoi eksperti i kriminalistikës.
