“Doja ta trembja“.
Këto janë fjalët me të cilat shqiptari Alvardo Agaraj ka nisur rrëfimin për vrasjen e 45-vjeçarit maroken Abderrahimi Elkharmoudi, mbrëmjen mes 23 dhe 24 tetorit në lokalin Agorà në Piazza Libertà të Milanos.
Kur kanë kaluar katër muaj nga ngjarja 22-vjeçari shqiptar ka dalë para gjykatës dhe ka pranuar krimin.
I mbrojtur nga avokatët Barbara Kolakowska dhe Amedeo Rizza, i riu nuk kishte dhënë kurrë versionin e tij të fakteve deri në marrjen në pyetje nga prokurori në janar.
22-vjeçari, i cili ndërkohë është arrestuar edhe për një sulm seksual të dyshuar nga një grup djemsh kur ai bënte pjesë, tha se kishte shkuar në lokal i armatosur pasi i kishin thënë se partnerja e tij ishte ngacmuar nga 45-vjeçari.
Sipas versionit të tij, ai më pas ka nxjerrë armën për të trembur marokenin, por kur ky i fundit është afruar me thikë, ndaj ai ka mbyllur sytë dhe ka tërhequr këmbëzën.
Ndërkohë, para vrasjes së 45-vjeçarit është kapur në kamerat e sigurisë momenti kur ai dhe e dashura e shqiptarit janë përfshirë në një sherr të dhunshëm.
Sakaq, i riu shqiptar ka deklaruar se kishte frikë se mos 45-vjeçari do i vriste të dashurën e tij, me të cilën debatoi brenda lokalit, dhe se ai vetë ishte shënjestër e një sulmi nga viktima.
Para se të kthehej në lokal për herë të dytë, Alvardo Agaraj, i cili ndodhet në burgun San Vittore në Milano, mori pistoletën në shtëpi nga frika se shtetasi maroken do t’i sulmonte të dashurën e tij.
“Sapo më pa duke u afruar, doli nga lokali dhe tentoi të më godasë me thikë. E qëllova dy herë me pistoletë, në gjok dhe bark”, rrëfeu ai dhe më pas zbuloi se i kishte thënë 45-vjeçarit: “Kështu do të mësosh si të respektosh gratë”.
22-vjeçari më pas ka thënë se mendonte që nuk e kishte vrarë marokenin. Natën pas vrasjes Alvardo ka zbuluar se ishte arratisur për në Belgjikë, ku kishte ikur me makinë bashkë me të dashurën e tij.
“Jam larguar më pas po natën e vrasjes me makinë në Belgjikë së bashku me të dashurën”, ka rrëfyer ai.
Por dy ditë më vonë ai u kthye në Itali dhe u paraqit në polici, ku u arrestua si i dyshuar për veprën penale të vrasjes me dashje.
Ndërkohë, viktima, i cili jetonte në San Pietro all’Olmo, ishte i njohur për policinë dhe frekuentonte shpesh lokalin ku ndodhi krimi. 45-vjeçari, gjithashtu me rekord kriminal u gjet në një makinë në qendër të rrugës, i shtrirë pa ndjenja dhe me një thikë ende në dorë. Menjëherë pas kësaj ai vdiq në spital.
