Karim Benzema nuk ka frikë të tregojë se e do edhe një tjetër Ligë Kampionesh në dollapin e trofeve të tij. Sulmuesi i Real Madrid tundi dy herë rrjetën sot ndaj Liverpulit në suksesin 5-2 në transfertë duke treguar se ekipi ka ambicie për të përsëritur suksesin e edicionit të kaluar.
“Ishte fitore shumë e rëndësishme, dua t’ia kushtoj këtë fitore presidentit tonë të nderit, Amancio. Kjo është për të. Luajtëm me personalitet dhe shënuam gola. E duam këtë Ligë Kampionesh, e nisëm keq dhe dinim që ky ekip, me këta tifozë, të vë gjithmonë në presion. Por pas 15 minutash në pamë Realin.
Futbolli është gjithmonë i komplikuar. Ata e nisën më mirë dhe ishin 2-0. Duhej të bënim më shumë dhe e bëmë.
Duartrokitjet e tifozëve? Falënderime kësaj tifozerie, por gjithashtu edhe tanëve. Janë lojtari ynë numër 12.
Dëshira për të shënuar? Kisha luajtur shumë pak deri më sot. Por nuk ka asgjë, ajo që dua të bëj është të ndihmoj ekipin dhe kjo është ajo që bëra sot. Vija nga një sezon me shumë ndeshje dhe Botërori më gjeti të dëmtuar. Por pak nga pak po ndjej veten mirë dhe vazhdoj kështu.
Në futboll mund të ndodhin shumë gjëra. Kemi bërë mirë, por do të tentojmë një tjetër ndeshje të madhe në “Santiago Bernabeu””, ishin fjalët e Benzema pas duelit.
