Në një intervistë për A2 CNN Jason Aldiss, sipërmarrës nga Mbretëria e Bashkuar, gjithashtu edhe përfaqësuesi i Mjekëve Veterinerë në Europë është shprehur se po përpiqet që të gjejë sa më shumë veterinerë dhe kasapë në vendin tonë.
“Që kur Britania e Madhe u largua nga Bashkimi Europian, pra Brexit, ne po vuajmë shumë për burime njerëzore. Janë mijëra vende boshe pune në sektorin agro-ushqimor dhe qindra të tjera në atë veterinar dhe përpunimin e mishit. Duke përfituar nga fakti që kam qenë edhe më herët në Shqipëri, po përpiqem që me atë të njohjeve të gjej sa më shumë veterinerë dhe kasapë”, rrëfen ai.
“Për aq kohë që unë jam i bindur se Mbretëria e Bashkuar po vuan dëshpërimisht për punonjës, njerëz që ne na nevojitet gjithandej e veçanërisht në sektorin agro-ushqimor, mendoj se në vend të deklaratave gati raciste të kemi hapje të portave për të mirëpritur shqiptarët që duan të punojnë. Besoj absolutisht që ju keni burimet njerëzore të kualifikuara që ne na nevojiten në Mbretërinë e Bashkuar”, shton sipërmarrësi.
Dhe ky proces hapjeje për Aldiss duhet të nisë me eliminimin e burokracive në procedurat ligjore.
Sipas britanikut, “burokracitë nuk mund të mungojnë, veçanërisht në drejtim të procedurave ligjore për rekrutimin e punonjësve të huaj. Po mund ta them i bindur që Home Office në mbretërinë e Bashkuar në vend të lehtësive ofron pengesa”.
Kompanitë në Britaninë e Madhe prej vitesh, e veçanërisht pas Brexit kanë ngritur alarmin për mungesë të fuqisë punëtore sidomos në sektorë që vendasit nuk i preferojnë.
