Një 50-vjeçar humbi jetën një ditë më parë në fshatin në fshatin Zvezdë, Maliq.
Fillimisht, ngjarja u raportua si aksidentale, nisur nga dëshmitë e familjarëve, por hetimet e mëvonshme zbuluan një krim në familje: Hamdi Bylykbashi është vrarë nga babai i tij Shefki Bylykbashi.
Familjarët dhanë version tjetër
“Shërbimet e Komisariatit të Policisë Maliq, pasditen e djeshme, pas marrjes së njoftimit se në spitalin e Korçës, ishte sjellë i pajetë Hamdi Bylykbashi, 50 vjeç, banues në fshatin Zvezdë, Maliq, menjëherë kanë shkuar në spital dhe në vendngjarje, me qëllim verifikimin e rastit. Fillimisht familjarët e tij kanë deklaruar se 50-vjeçari, duke qenë në gjendje të dehur, ishte rrëzuar aksidentalisht në banesën e tij dhe për pasojë kishte marrë dëmtime në kokë”, njofton policia.
Pas hetimeve të thelluara të kryera nga grupi hetimor i përbërë nga specialistët për Hetimin e Krimeve të Komisariatin e Policisë Maliq dhe specialistët e Seksionit për Hetimin e Krimeve të Rënda të DVP Korçë, nën drejtimin e Prokurorisë së Rrethit Gjyqësor Korçë, u bë e mundur zbardhja e rrethanave të kësaj ngjarjeje.
Vrasja
Sipas të njëjtave burime, nga hetimet e thelluara dhe provat e siguruara rezultoi se pasditen e djeshme, 50-vjeçari duke qenë në gjendje të dehur, është konfliktuar në banesë me babain Shefki Bylykbashi, 77 vjeç, të cilin ka dashur t’a hedhë në pusin e ujit në oborr.
Më pas 77-vjeçari, e ka goditur disa herë në kokë me mjete të forta (çekiç që përdoret për të thyer gurë), ku si pasojë e dëmtimit të rëndë, 50-vjeçari ka humbur jetën gjatë transportimit për në spitalin e Korçës.
Në vijim të veprimeve procedurale, u bë arrestimi në flagrancë i Shefki Bylykbashit për veprën penale “Vrasja për shkak të marrëdhënieve familjare”.
“Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme”, mbyllet njoftimi i bluve.
Lexo edhe:
FOTO/ Vrau djalin me çekiç, këta janë babë e bir që u konfliktuan në Maliq
Babai vrau djalin, kryeplaku: S’e kishim besuar kurrë se mund të arrinte deri këtu
Vrau djalin me çekiç/ 77-vjeçari: Nuk doja, por s’duroja dot më se pinte
