Prokuroria e Posaçme ka dhënë pretencën për të akuzuarit për vrasjen e babë e bir, Nezir e Gentian Beqiri në Elbasan, në vitin 2012.
Në pretencën e dhënë ditën e sotme, SPAK kërkon burgim të përjetshëm për Ardian Çapjan dhe për Olsi Lekun.
Ndërkohë, kërkohen nga organi i akuzës 25 vite burg për Florenc Çapjan, 20 vite për Klajdi Dokollin dhe për Etien Canin, dhe vetëm 6 vite për Ervis Bardhin.
Të gjithë këta persona janë të dyshuar për vrasjen e Nezir e Gentian Beqirit, ndërsa i akuzuari kryesor për vrasjen është Ardian Çapja, i cili ka pretenduar në seancat e mëparshme para GJKKO se është i pafajshëm.
Ai gjithmonë ka këmbëngulur në alibinë se ishte jashtë Shqipërisë në momentin kur ka ndodhur krimi.
Gjashtë të përfshirët në këtë ngjarje akuzohen për “Vrasje në rrethana cilësuese ndaj 2 ose me shumë personave”, “Grup të strukturuar kriminal” dhe “Armëmbajtje pa leje”.
Ardian Çapja u arrestua më 29 mars në Elbasan, ndërsa nipi i tij, Florenc Çapja është ende në kërkim nga Policia. Drejtësia ra në gjurmët e xhaxha dhe nip falë dëshmisë së të penduarit të drejtësisë, Ervis Bardhi, i cili mes të tjerash, ka thënë se Ardian Çapja i kishte ofruar 50 mijë euro për vrasjen e Gentian Beqirit dhe babait të tij Nezirit.
DËNIMET E KËRKUARA NGA SPAK:
Ardian Çapja – burg përjetë
Olsi Leku – burg përjetë
Florenc Çapja – 25 vite burg
Klajdi Dokoli – 20 vite burg
Etien Cani – 20 vite burg
Ervis Bardhi – 6 vite burg
VRASJA
Në 15 gusht të vitit 2012, 40-vjeçari, Gentian Beqiri, është ekzekutuar në banesën e tij, në lagjen “Sporti i Vjetër”, të Elbasanit. Dëshmitar i ngjarjes së rëndë, ka qenë babai i tij, Nezir Beqiri, i cili ndërroi jetë pak minuta pas të birit.
Fillimisht u dyshua se Nezir Beqiri kishte pësuar infarkt pas ngjarjes, por ekspertiza mjekoligjore përcaktoi se i moshuari ka humbur jetën si pasojë e plagëve të shumta që ka marrë në trup. Ekzekutorët e kanë goditur disa herë në mushkëri, duke i shkaktuar hemorragji e pas disa minutash në urgjencën e qytetit, ai gjeti edhe vdekjen. Dyshohet se vrasjet janë kryer për motive hakmarrjeje, pasi në 2005-ën, Gentian Beqiri është akuzuar nga organet e drejtësisë për vrasjen e biznesmenit Sokol Çapja, vrasje e cila ka ndodhur në një prej bareve të Elbasanit, pranë Universitetit “Aleksandër Xhuvani”.
Prej disa kohësh 40-vjeçari, Gentian Beqiri, ishte në “Arrest shtëpie” për këtë vrasje. Ai vuante nga një dëmtim në shtyllën kurrizore, për shkak të një tentative arratisjeje nga qelitë e paraburgimit. Vrasjet janë kryer në gjakftohtësi dhe dy efektivët rojë nuk e kanë kuptuar që ekzekutorët kanë kryer krimin.
Në kohën kur Ervis Bardhi ka qëlluar për vdekje Gentian Beqirin, dy policët që ishin të planëzuar me shërbim për ta mbajtur nën mbikëqyrje, duke qenë se ai ishte në “Arrest shtëpie”, nuk ndodheshin në vendin e shërbimit.
Bëhet fjalë për efektivët e Komisariatit të Elbasanit, Sami Derstila dhe Neshat Budani. Fillimisht ata janë marrë në hetim për vrasje në rrethana cilësuese, por më pas është arritur në përfundimit se ata kishin konsumuar vetëm veprën penale të “Shpërdorimit të detyrës”
