Tetë ditë më parë ish-zyrtarja e Kryeministrisë, Alda Klosi, e cila akuzohet për veprat penale; “pastrim parash”, “fshehje të pasurisë” dhe “deklarim të rremë para oficerit të Policisë Gjyqësore” u dërgua në qeli pas katër ditëve të kaluara në spital, që pasuan arrestimin e saj.
Ish-zyrtarja e Kryeministrisë dhe këshilltare e Arben Ahmetajt, 12 orë pas arrestimit nuk përballoi dot presionin dhe përfundoi nën kujdesin e mjekëve, por tashmë ndodhet në të njëjtin burg me pastruesen Rozeta Dobi, arrestimi i së cilës çoi në zbulimin e 120 mijë eurove të vjedhura në shtëpinë e Klosit dhe mbi 405 mijë të tjerave, të fshehura në tubin e aspirimit të kuzhinës.
Gjykata ka caktuar për Klosin masën e sigurisë “arrest me burg” dhe ajo ndodhet në qelitë e burgut të grave “325”, në zonën e “Ali Demit”, por ish-zyrtarja ka paraqitur në Apel një kërkesë për vendosjen e një mase më të butë sigurie.
Sipas një njoftimi të shpërndarë për mediat nga Apeli, Alda Klosi do të dalë këtë të hënë në gjyq ku do të kërkojë një masë më të butë sigurie.
“Duke marrë parasysh interesimin e mediave, Gjykata e Apelit të Juridiksionit të Përgjithshëm ju informon se: Ankimi i personit nen hetim, Alda Klosi, ndaj vendimit te vleresimit te ndalimit/caktimin e mases se sigurimit “arrest ne burg”, është planifikuar për tu gjykuar me datë 20.02.2023, ora 10:20, me Gjyqtare Irena Brahimi”, thuhet në njoftim.
Klosi kërkon lirimin nga qelia duke kundërshtuar vendimin e shkallës së parë, që i caktoi masën “arrest me burg” me pretendimin se gjendja e saj shëndetësore nuk është e mirë.
Po ashtu, ish-zyrtarja pretendon se i duhet të kujdeset për nënën e saj të moshuar, e cila është edhe e verbër.
Edhe avokati i saj mbrojtës pasi depozitoi kërkesën më 13 shkurt, u shpreh se e kërkonte lirinë e klientes së tij për shkakun se përveç nënës së sëmurë ajo ka gjithashtu dy fëmijë të mitur për të mbajtur.
Por, në të gjithë dëshmitë e dhëna nga Klosi nuk është bërë me dije se nëna e saj jeton me të.
