Një kërkesë e bërë nga opozita për shkarkimin e kryeparlamentares Lindita Nikolla u votua në seancën e sotme plenare, duke u hedhur poshtë me 78 vota kundër.
Pak para votimit, gjatë fjalës së kryetares së Kuvendit, ku tha se do të vazhdonte misionin e saj edhe pas akuzave të opozitës se është duke shkelur vazhdimisht rregulloren duke përjashtuar çdo seancë deputetë të PD, në sallë hyri edhe kryeministri Edi Rama.
Jo për të dhënë përgjigje për skandalin McGonigal, që e lidh me korruptimin e ish-zyrtarit të FBI, por më tepër si për t’i dhënë mbështetjen (jo vetëm me votë) por edhe morale, Lindita Nikollës, e cila e ka “fshehur” si duhet nga vala e akuzave të Sali Berishës.
Ajo çka tjetër ra në sy në këtë votim për Nikollën, ishte fakti i konfirmimit në detyrë me votat kundër të 78 deputetëve, dy më shumë sesa njerëzit e mazhorancës prezentë në sallë.
Për shkarkimin e kryetares së Kuvendit shkuan vetëm 3 vota pro, por vetëm dy deputetë të opozitës ndodheshin në sallë.
Respektivisht Oerd Bylykbashi për PD dhe Petrit Vasili për PL rezultojnë të kenë marrë pjesë në votim dhe qëndrimet e tyre janë publikisht kundër Nikollës.
Sipas A2CNN logjika e shifrave paraqet dy skenarë. Në rast se 76 deputetët e mazhorancës që ishin në sallë kanë qëndruar kompaktë në favor të kryeparlamentares, me ta janë bashkuar edhe 2 nga 3 deputetët e PDIU.
Opsioni tjetër është që kundër Nikollës të ketë shkuar edhe një votë nga shumica e majtë dhe në këtë rast ajo të ketë marrë mbështetjen e të tre deputetëve të PDIU që votuan.
