Me një diferencë më pak se një muaj, Partia Demokratike ka vendosur të mobilizojë sërish mbështetësit e saj dhe qytetarët për të dalë në një protestë kombëtare, duke kërkuar dorëheqjen e kryeministrit Edi Rama.
Në mbledhjen e Kryesisë që po zhvillohet në selinë blu është marrë vendimi që më 3 mars të dilet sërish në Bulevardin “Dëshmorët e Kombit” në një tubim ku kërkohet mbështetje masive e qytetarëve.
Duket se përzgjedhja e datës 3 Mars nuk është edhe aq e rastësishme, pasi në të njëjtën ditë Gjykata e Apelit pritet të vendosë për çështjen e vulës së Partisë Demokratike.
Apeli njoftoi katër ditë më parë se “ankimi i Partisë Demokratike, ndaj vendimit nr. 3 datë 25.03.2022 (Gjyqtar Agron Zhukri) të Gjykatës së Rrethit Gjyqësor Tiranë, është planifikuar për tu gjykuar me datë 03.03.2023, ora 11:00”.
Ndërkohë, trupi gjykues do të përbëhet nga relatore Elona Mihali dhe anëtarët Irida Kacerja e Astrit Kalaja.
Protesta pritet kështu të jetë tepër dinamike dhe me kuriozitet mbetet për t’u parë orari që organizatorët do të përzgjedhin, duke nisur nga rëndësia e vendimit të Gjykatës së Apelit, pasi prej tij do të varet edhe verdikti i KQZ më 7 mars, në lidhje me regjistrimin ose jo të Partisë Demokratike në zgjedhjet e 14 majit.
Ashtu siç vetë kreu i institucionit, Ilirjan Celibashi bëri me dije pak ditë më parë, pas mbledhjes ku u la jashtë rendit të ditës lista me anëtarët e depozituar për KZAZ-të nga të dyja kampet e PD-së, do të jetë 7 Marsi dita kur do të vendosin se cilën PD do të regjistrojë KQZ si subjekt zgjedhor, grupimin e Alibeajt apo partinë e drejtuar nga Sali Berisha.
Ndërkohë sipas asaj që mësohet, protestat para Parlamentit nuk do të ndalen sa herë që do të ketë seancë plenare. Një protestë e ngjashme para Kuvendit u zhvilluar pasditen e djeshme dhe zgjati pak më shumë se dy orë, me qytetarët pjesëmarrës në tubim që kërkuan largimin e kryeministrit Edi Rama pasi sipas tyre ka dalë zbuluar në SHBA, duke korruptuar zyrtarin e lartë të FBI, Charles McGonigal.
Për fatin e protestave foli edhe sot kryedemokrati Berisha, duke qartësuar të vetëve se duhet të vijohet me komunikime dhe kontakte direkte me qytetarët, ndërsa mund të shkohet deri në mosbindje civile, por duke shmangur dhunën si opsion.
“Gjithçka, fati i këtij revolucioni varet nga komunikimi ynë me intensiv me qytetarët. Jo nëpërmjet ekraneve. Komunikimi është i akullt. Do të përdorim ekranet, pro kontaktet direkte janë rruga absolute e revolucionit. Duhet të vazhdojmë me persistencë absolute këtë revolucion. Në mënyrë kreative. Unë e di që çdo ditë do dëgjoni njerëz që ju thonë se pa dhunë, nuk përmbyset, nuk arrihet. Unë u them atyre, dhe ju do u thoni, se qëndresa është forcë. Dhuna nuk të sjell në objektivat që kërkon. Ne jemi në hapat më fillestarë të mosbindjes civile, të shfrytëzimit të potencialit të jashtëzakonshëm që ka mosbindja civile. Nuk shkojmë te forca. Sepse të shkosh te forca, do të thotë të marrësh pushtetin me forcë. Që në këtë moment, kjo forcë asgjëson veten. Por përdorim çdo formë të mosbindjes civile”, deklaroi Berisha.
