Një italian 25-vjeçar dhe një shqiptar 30 vjeç janë vënë në pranga nga policia italiane në Castagnito.
Karabinierët arrestuan dy të rinjtë për posedim droge, armëmbajtje pa leje dhe përdorimin e dokumenteve false. Ata ishin mbajtur nën vëzhgim për çdo hyrje dhe dalje nga banesa e tyre në Castagnito, ku edhe u arrestuan.
Sa i përket italianit ai u lirua nga burgu pak më pak se dy vjet më parë pasi ishte dënuar për tentativë vrasjeje, ndërsa shqiptari ishte dënuar për drogë dhe u dëbua nga Italia, përpara se të kthehej sërish ilegalisht.
Sakaq, 25-vjeçari ka rezistuar dhe ka tentuar të arratiset kur karabinierët hynë në shtëpi, ndërsa shqiptari ka tentuar të mashtrojë ushtarakët duke dhënë të dhëna të rreme personale. 30-vjeçari mbante pasaporta dhe dokumente identiteti të falsifikuara, aq sa identiteti i tij u bë i mundur vetëm falë gjurmëve të gishtave.
Brenda banesës u gjetën rreth 150 gramë kokainë të pastër, si dhe sasi të vogla hashashi dhe mariuane. Ata mbanin gjithashtu një pistoletë dhe municione dhe shkopinj bejsbolli.
