Uji i pijshëm në kryeqytet ka qenë gjithmonë një temë diskutimi që ka prodhuar debat, pasi kryebashkiaku Erion Veliaj promovon herë pas herë investime në rrjetin e ujësjellësit, por qytetarët vijojnë të blejnë ujin për konsumin e përditshëm, pasi ai që rrjedh në rubineta është i ndotur.
Gjithashtu denoncimet e qytetarëve në rrjetet sociale për ujin jashtë standardeve që rrjedh në çezmat e shtëpive të tyre, ka bërë që opinioni publik të jetë gjithmonë e më shumë sensitiv përkundrejt këtij problemi.
E teksa qytetarët denoncojnë dhe autoritetet deklarojnë se uji në rubineta është i pijshëm dhe brenda standardeve, ai që do të vlente në këtë rast është mendimi i ekspertëve të fushës.
Por një prej ekspertëve të mjedisit, Françeska Korançe ka habitur jo pak me një deklaratë të dhënë sot sa i përket cilësisë së ujit të pijshëm në Tiranë.
Teksa ishte e ftuar në një emision televiziv në MCN, ajo tha se uji në Tiranë është i pijshëm, pavarësisht problemeve shëndetësore që mund të shkaktojë konsumimi i tij.
Sikur të mos mjaftonte kjo, ekspertja Korançe vijoi duke thënë se problemet shëndetësore nga uji i pijshëm në kryeqytet nuk janë aq serioze, pasi sipas saj nuk të shkaktojnë humbjen e jetës.
“Uji është i pijshëm por kjo nuk do të thotë që është i mirë. Mund të kesh probleme shëndetësore por nuk është se është vdekjeprurës. Ndaj qëllojnë në linjën e hollë, bëjnë analizën, del i pijshëm”, tha Korançe.
